اسلام آباد (نیوز ڈیسک) محکمہ موسمیات نے رمضان المبارک 1447 ہجری کے آغاز سے متعلق تازہ فلکیاتی پیش گوئی جاری کر دی ہے۔

محکمہ موسمیات کے مطابق پاکستان میں رمضان کا چاند 18 فروری کو نظر آنے کے امکانات مضبوط ہیں، جس کے باعث پہلا روزہ 19 فروری کو ہونے کی توقع ظاہر کی جا رہی ہے۔ محکمہ موسمیات کا کہنا ہے کہ رمضان المبارک کے چاند کی پیدائش 17 فروری کو شام 5 بج کر ایک منٹ پر ہوگی۔ فلکیاتی حساب کے مطابق 18 فروری کو کراچی میں چاند کی عمر تقریباً 26 گھنٹے ہو جائے گی، جو رویت کے لیے موزوں سمجھی جاتی ہے۔ محکمے کے مطابق 18 فروری کو کراچی میں سورج 6 بج کر 25 منٹ پر غروب ہوگا جبکہ چاند 7 بج کر 24 منٹ پر غروب ہوگا، جس کے باعث چاند دیکھنے کے لیے مناسب وقت میسر آئے گا اور رویت کے امکانات مزید بہتر ہو جائیں گے۔

البتہ رمضان المبارک کے آغاز کا حتمی اعلان مرکزی رویت ہلال کمیٹی کے فیصلے کے بعد ہی کیا جائے گا۔