لیسٹر( آن لائن )قومی ٹیم کے نوجوان بلے باز بابر اعظم نے انگلش کانٹی لیسٹر شائر کے خلاف ٹی ٹونٹی پریکٹس میچ کے دوران وہ کارنامہ کردکھایا جو بھارتی کپتان ویرات کوہلی بھی اب تک برطانوی سرزمین پر نہیں کرسکے ہیں۔گریس روڈ پر کھیلے گئے ٹی ٹونٹی ٹور میچ میں لیسٹرشائر کے کپتان نے ٹاس جیت کر فیلڈ سنبھالی ۔

فخرزمان اور بابر اعظم نے اس چیلنج کو قبول کرتے ہوئے صرف گیارہ اوورز میں 104رنز کی سنچری شراکت قائم کر ڈالی۔فخر زمان نے 52 رنز کو آٹھ چوکوں اور ایک چھکے سے سجایا جبکہ آصف علی نے تین چوکوں سمیت 22رنز بنا کر بابر اعظم کے ساتھ مزید 65رنز کا اضافہ کیا جو اپنی سنچری کے قریب پہنچ گئے تھے۔ پاکستانی ٹیم چار رنز کے فرق سے دو وکٹیں گنوا بیٹھی جب فہیم اشرف گیارہ اور پھر بابر اعظم بھی 13چوکوں اور دو چھکوں کی مدد سے 101رنز بنا کر میدان چھوڑ گئے تاہم مقررہ بیس اوورز میں پاکستان نے چھ وکٹوں پر 200رنز کا مجموعہ سکور بورڈ پر سجادیا،بابر اعظم نے برطانوی سرزمین پر اپنے ٹی ٹونٹی کیریئر کی پہلی سنچری سکور کی ،بھارتی کپتان ویرات کوہلی انگلش کنڈیشنز میں5میچز میں 45کی اوسط سے180رنز سکور کرچکے ہیں تاہم وہ صرف ایک ہی نصف سنچری سکور کرسکے ہیں۔ہوم ٹیم کی جانب سے بین مائیک نے تین اورڈائٹر کلین نے دو وکٹیں حاصل کیں۔ جوابی اننگز میں لیسٹرشائر کو اچھا آغاز نہیں مل سکا جب اس کی ابتدائی چھ وکٹیں محض 63رنز پر گر گئیں اور اس دوران مارک کاسگروو 19اور عادل علی کو دس رنز بنا کر دہرے عدد میں داخل ہونے کا موقع مل سکا۔لیسٹرشائر کو آٹھ وکٹیں 81رنز پر گرنے کے بعد بین مائیک نے 37 اور کیلم پارکنسن نے 27رنز بنا کر سہارا دینے کی پوری کوشش کی لیکن مجموعی سکور آٹھ وکٹوں پر 142سے آگے نہ جا سکا۔عماد وسیم اور شاہین آفریدی نے دو،دو وکٹیں حاصل کرکے پاکستان کی کامیابی یقینی بنائی۔