اسلام آباد (نیوز ڈ یسک) بھارتی کرکٹ ٹیم کے کپتان سوریا کمار یادو نے ٹی ٹوئنٹی ورلڈ کپ جیتنے کے بعد

اپنے جذبات کا اظہار کرتے ہوئے کہا ہے کہ یہ کامیابی ایک طویل اور محنت طلب سفر کا نتیجہ ہے۔ ان کا کہنا تھا کہ اس تاریخی فتح کے احساس کو پوری طرح سمجھنے میں ابھی کچھ وقت لگے گا، تاہم وہ اس کامیابی پر بے حد خوش اور مطمئن ہیں۔ورلڈ چیمپئن بننے کے بعد گفتگو کرتے ہوئے سوریا کمار یادو نے بتایا کہ اس کامیابی کی بنیاد 2024 کے ورلڈ کپ کے بعد رکھی گئی تھی، جب جے شاہ اور روہت شرما نے ان پر اعتماد کرتے ہوئے ٹیم کی قیادت ان کے سپرد کی۔ ان کے مطابق بھارتی ٹیم گزشتہ دو برسوں سے مسلسل عمدہ کارکردگی دکھا رہی ہے اور ان کی کوشش یہی تھی کہ 2024 کے ورلڈ کپ کے دوران اپنائی گئی مثبت حکمت عملی اور عادات کو برقرار رکھا جائے۔انہوں نے کہا کہ ٹیم کی کامیابی کے لیے کھلاڑیوں کی صلاحیتوں کو درست انداز میں سمجھنا انتہائی اہم ہوتا ہے۔ ان کے بقول انہیں معلوم تھا کہ ٹیم میں کئی ایسے کھلاڑی موجود ہیں جو کسی بھی موقع پر میچ کا رخ بدل سکتے ہیں۔بھارتی کپتان نے فائنل میں شاندار کھیل پیش کرنے پر سنجو سیمسن اور ابھیشیک شرما کی بھی تعریف کی اور کہا کہ دونوں کھلاڑیوں نے بڑے میچ میں بہترین کارکردگی دکھا کر ٹیم کی کامیابی میں اہم کردار ادا کیا۔

سوریا کمار یادو نے فاسٹ باؤلر جسپریت بمراہ کی تعریف کرتے ہوئے انہیں “نسلوں میں ایک بار پیدا ہونے والا باؤلر” اور “قومی اثاثہ” قرار دیا۔ ان کا کہنا تھا کہ بمراہ اپنے فن کے ماہر ہیں اور اچھی طرح جانتے ہیں کہ اہم مواقع پر کس طرح باؤلنگ کرنی ہے۔