اسلام آباد (نیوز ڈ یسک)خلیجی ممالک میں عیدالفطر کے حوالے سے شوال کے چاند سے متعلق ایک نئی فلکیاتی پیشگوئی سامنے آئی ہے۔

عرب میڈیا کے مطابق العجیری سائنٹیفک سینٹر نے اپنے حسابات کی بنیاد پر چاند کی رویت کے بارے میں تفصیلات جاری کی ہیں۔سینٹر کے مطابق فلکیاتی اندازوں کے تحت بدھ 18 مارچ 2026 (29 رمضان المبارک) کی شام کو شوال کا چاند نظر آنے کا امکان بہت کم ہے۔ بیان میں کہا گیا ہے کہ اس روز کویت سمیت بیشتر خلیجی ممالک میں چاند سورج غروب ہونے سے پہلے ہی افق سے نیچے چلا جائے گا، جس کی وجہ سے فلکیاتی لحاظ سے اس کا نظر آنا ممکن نہیں ہوگا۔العجیری سائنٹیفک سینٹر کا کہنا ہے کہ نئے چاند کی پیدائش جمعرات 19 مارچ کو کویت کے مقامی وقت کے مطابق صبح تقریباً 4 بج کر 23 منٹ پر ہوگی۔ چونکہ یہ وقت اس دن کے غروب آفتاب کے بعد رویت سے متعلق حالات سے مطابقت نہیں رکھتا، اس لیے اس سے ایک رات پہلے چاند دیکھنا ممکن نہیں ہوگا۔ان فلکیاتی اندازوں کی روشنی میں توقع کی جا رہی ہے کہ رمضان المبارک کے 30 روز مکمل ہوں گے۔

اس حساب سے جمعرات 19 مارچ غالباً رمضان کا آخری دن ہوگا جبکہ جمعہ 20 مارچ 2026 کو عیدالفطر منائے جانے کا امکان ہے۔سینٹر نے واضح کیا کہ ہجری مہینوں کے آغاز کا حتمی اعلان متعلقہ ممالک کے مجاز حکام ہی کریں گے، جو شرعی اصولوں اور باقاعدہ رویتِ ہلال کے طریقہ کار کے مطابق فیصلہ کرتے ہیں۔