سڈنی (این این آئی)ورلڈ کپ 2019 کیلئے آسٹریلیا کی جانب سے پہننے جانے والا یونیفارم منظر عام پر آگیا ۔آسٹریلوی خبر رساں ویب سائٹ کی رپورٹ کے مطابق آسٹریلوی ٹیم کی جانب سے ماضی میں جیتے گئے ورلڈ کپ سے متاثر اس لباس سے آسٹریلیا کے مداحوں میں ماضی جیسے

جذبات دوبارہ ابھارنے کی کوشش کی گئی ہے۔لباس میں روایتی پیلے رنگ میں ہرے رنگ کو شامل کیا گیا ہے جس کا کالر کھلا رکھا گیا ہے۔اے ایس آئی سی ایس کی جانب سے کٹ کے ماڈل کے طور پر گلین میکس ویل کو پیش کیا گیا۔واضح رہے کہ آسٹریلیا کی مسلسل 2 سیریز میں کامیابی سے ٹیم کے مداحوں میں ایک نئی امید پیدا ہوگئی ہے کہ لارڈز کے میدان سے ٹرافی ایک مرتبہ پھر ان کے گھر آئے گی۔آسٹریلیا نے حال ہی میں بھارت کو 2۔3 سے سیریز میں شکست دی تھی ،پاکستان سے کھیلی گئی سیریز میں انہوں نے 0۔5 سے وائٹ واش کیا تھا۔خیال رہے کہ آسٹریلیا کے ورلڈ کپ میں کھیلنے والے15 کھلاڑیوں پر مشتمل اسکواڈ کا اعلان آئندہ ہفتے کیا جائیگا۔اعلان کیا گیا اسکواڈ برسبین میں پری ورلڈ کپ کیمپ میں اکھٹے ہوکر نیوزی لینڈ کے خلاف تین پریکٹس میچز کھیلے گا۔بعد ازاں آسٹریلیا کی ٹیم یکم جون کو افغانستان کے خلاف میچ کھیلے گی۔