اسلام آباد(این این آئی)18 ویں قومی نیٹ بال چمپئن شپ میں پاکستان آرمی نے مردوں اور خواتین کے دونوں ٹائٹل جیت لئے ،پاکستان واپڈا اور سندھ کی ٹیمیں بالترتیب مردوں اور خواتین کے ٹائٹل کے دفاع کو برقرار رکھنے میں ناکام رہیں۔ چمپئن شپ کی اختتامی تقریب کے مہمان خصوصی
وفاقی سیکرٹری بین الصوبائی رابطہ اکبر حسین دورانی تھے جنہوں نے کامیابی حاصل کرنے والی ٹیموں کے کھلاڑیوں میں ٹرافیاں، میڈلز اور اسناد تقسیم کیں۔ اس موقع پر پاکستان نیٹ بال فیڈریشن کے چیئرمین کیپٹن (ر ) ظفر اقبال اعوان، صدر مدثر آرائیں، سیکرٹری جنرل محمد ریاض، پاکستان تھروبال فیڈریشن کے سیکرٹری جنرل مقبول آرائیں اور پاکستان لان بال فیڈریشن کے سیکرٹری جنرل رانا وسیم مقصود کے علاوہ شائقین کی کثیر تعداد بھی موجود تھی۔ خواتین کے فائنل میں پاکستان آرمی نے دفاعی چمپئن سندھ کو 30۔20 شکست دے کر چمپئن ہونے کا اعزاز حاصل کیا، مردوں کے فائنل میں بھی پاکستان آرمی نے دفاعی چمپئن پاکستان واپڈا کو 32۔28 گول سے ہرا کر ٹائٹل اپنے نام کرلیا۔ فائنل سے قبل مردوں کی تیسری پوزیشن کھیلے گئے میچ میں پاکستان نیوی نے سندھ کو 35۔22 گول سے ہرادیا، خواتین کے ایونٹ کی تیسری پوزیشن کے لئے کھیلے گئے میچ میں پاکستان واپڈا نے ہائر ایجوکیشن کمیشن کو 29۔18 گول سے شکست دی۔
