اسلام آباد(این این آئی) پاکستان بلائنڈ بیس بال ایسوسی ایشن کے زیراہتمام قومی بلائنڈ بیس بال چمپئن شپ 26 مارچ سے ملتان شروع ہو گی۔پاکستان بلائنڈ بیس بال ایسوسی ایشن کے صدر سید فخر علی شاہ نے بتایاکہ چمپئن شپ کی تیاریاں زور شور پر ہیں اور چمپئن شپ میں پانچ ٹیمیں حصہ لے رہی ہیں۔
جن میں پنجاب، سندھ، خیبر پختونخوا، بلوچستان اور اسلام آباد کی ٹیمیں شامل ہیں، چمپئن شپ میں شرکت کرنے والی ٹیموں کے منیجرز کی میٹنگ 25 مارچ کو شام پانچ بجے ہوگی جس میں چمپئن شپ ڈراز کا اعلان اور قوانین کے بارے میں آگاہ کیا جائیگا۔انہوں نے کہا کہ 26 سے 28 تک کھلاڑیوں کا تربیتی کیمپ لگایا جائیگا جس میں اٹلی سے تعلق رکھنے والا کوچ تربیت دیں گے۔ ٹورنامنٹ میں آرگنائزنگ سیکرٹری کے فرائض ڈسٹرکٹ سپورٹس آفیسر جمیل کامران انجام دیں گے اور یہ چمپئن شپ 31 مارچ تک جاری رہے گی فائنل کے اختتام پر کامیابی حاصل کرنے والی ٹیموں کے کھلاڑیوں میں انعامات تقسیم کئے جائیں گے۔ انہوں نے کہا کہ چمپئن شپ کی تیاری کے سلسلہ میں ٹیموں کے تربیتی کیمپ اپنے اپنے علاقوں میں جاری ہیں اور کھلاڑی بھرپور کررہے ہیں۔ انہوں نے کہا کہ نابینا افراد بھی ایک معاشرے کا حصہ ہیں ان کی بھی حوصلہ افزائی کرنا ہمارے سب کے فرائض میں شامل ہے، انہوں نے کہا کہ ہماری کوشش ہوگی کہ اس چمپئن شپ کا کامیاب انعقاد ہو کیونکہ یہ چمپئن شپ پہلی بار منعقد ہورہی ہے۔
