کراچی (این این آئی) پاکستان سے نفرت اوردشمنی دکھا نے والا بھارت اپنے ہی جال میں پھنس گیا۔پاکستانی شوٹرز کو شوٹنگ ورلڈ کپ کے لیے ویزا دینے سے انکار کے بعد بعدکھیل کی عالمی گورننگ باڈی نے بھارت پر پابندی لگانے کا عندیہ دے دیا۔ پاکستانی شوٹرز جی ایم بشیر اور خلیل احمد کو اپنے منیجرز کے ہمراہ ایونٹ میں شرکت کرنا تھی ویزا نہ ملنے پر پاکستانی شوٹرزایونٹ کی رسمی کارروائیوں کے لیے
بھارت نہیں پہنچ پائے جس کے بعد انٹرنیشنل شوٹنگ اسپورٹس فیڈریشن نے بھارت کو واضح کیا ہے کہ اگر انہوں نے پاکستانی کھلاڑیوں کو ایونٹ میں شرکت سے محروم کیا تو انہیں مستقبل میں کسی بھی ایونٹ کی میزبانی نہیں دی جائے گی۔ شوٹنگ ایونٹ میں پاکستانی کھلاڑیوں کو شرکت سے روکنے کی صورت میں بھارت کو انٹرنیشنل اولمپک کمیٹی کی جانب سے بھی کارروائی کا سامنا کرنا پڑ سکتا ہے۔
