اسلام آباد(این این آئی)پاکستان ٹیم کے کپتان سرفراز احمد کی جانب سے نسلی تعصب پر مبنی ریمارکس پر معذرت کے بعد جنوبی افریقی ٹیم نے انہیں معاف کردیا ہے۔جنوبی افریقی کپتان فاف ڈوپلیسی نے میڈیا سے بات چیت کے دور ان کہاکہ سرفراز نے معافی مانگ لی جس کو ٹیم نے قبول کرلیا ہے لیکن معاملہ اب آئی سی سی کے پاس ہے۔جنوبی افریقی کپتان نے کہاکہ ’’جب آپ جنوبی افریقا آتے ہیں ، نسلی تبصرہ کرتے ہوئے آپ کو بہت محتاط رہنا ہوتا ہے، مجھے یقین ہے کہ اْن کا یہ مطلب نہیں ہوگاتاہم

انہوں نے ذمہ داری قبول کی ہے اب ہمیں دیکھنا ہوگا کہ اس معاملے کا نتیجہ سامنے آتا ہے‘‘۔انہوں نے کہا کہ یہ ایسی چیز نہیں ہے جسے بحیثیت ٹیم ہلکا لیا جائے تاہم یہ حقیقت ہے کہ اْنہوں نے معذرت کرلی، جس کا صاف مطلب ہے کہ اْس جانب پچھتاوا ہے۔دوسری میچ ریفری رنجن مدوگالے نے سرفراز کے معاملہ پر اپنی رپورٹ پیش کردی ہے اور آئی سی سی اس رپورٹ کا تجزیہ کر رہا ہے۔قوانین کے مطابق رپورٹ کے بعد اب آئی سی سی کا لیگل ڈپارٹمنٹ اس بات کا تعین کریگا کہ کیس بنتا ہے یا نہیں۔