ڈربن(این این آئی) پاکستان کرکٹ ٹیم کے کپتان سرفراز احمد جنوبی افریقا کیخلاف 5 ون ڈے میچز کی سیریز کے دوسرے میچ میں شکست کو سامنے دیکھ کر آپے سے باہر ہوگئے۔میڈیا رپورٹ کے مطابق سوشل میڈیا پر میچ کے حوالے سے ایک ویڈیو گردش کررہی ہے جس میں مبینہ طور پر سرفراز احمد جنوبی افریقا کے سیاہ فام کھلاڑی اینڈائل پھیل کوایو کے حوالے سے تضحیک آمیز جملے ادا کررہے ہیں۔دوسرے ون ڈے میچ کے دوران سرفراز احمد شدید مایوسی کا شکار نظر آئے، سرفراز کے جنوبی افریقی کرکٹر کے بارے میں مبینہ طور پر نسلی تعصب پر مبنی فقرے

نے سوشل میڈیا پر تنازع کھڑا کردیا ہے اور کرکٹ شائقین نے انہیں آڑے ہاتھوں لیا ۔ذرائع کے مطابق سرفراز احمد کے مبینہ نسل پرستانہ جملے ان کیلئے مشکلات کا سبب بن سکتے ہیں کیوں کہ انٹرنیشنل کرکٹ کونسل اس حوالے سے سخت مؤقف رکھتا ہے۔ سرفراز نسل پرستی کے مرتکب قرار پائے تو انہیں سزا ہوسکتی ہے۔