اسلام آباد (نیوز ڈیسک) تحریک انصاف کے رہنما جہانگیر ترین کے صاحبزادے علی ترین نے ٹوئٹر پر اپنے پیغام میں ملتان سلطانز کی ٹیم پانچ ملین سے زائد میں فروخت ہونے کا دعویٰ کیا ہے، انہوں نے اپنے ٹویٹ پیغام میں کہا کہ گزشتہ سال ملتان سلطانز 5.2 ملین میں فروخت ہوئی تھی، میں سمجھتا تھا کہ یہ زیادہ قیمت میں خریدی گئی، اسی وجہ سے ایک سال بعد ہی اس کا مالک پی سی بی کو پیسوں کی ادائیگی کرنے

میں ناکام ہوگیا اور اب دوبارہ سے یہ ٹیم نیلام ہوگی۔ انہوں نے اپنے پیغام میں مزید کہا کہ انہوں نے اس ٹیم کو جنوبی پنجاب میں رکھنے کیلئے منصوبہ بنایا تھا کہ وہ 4 ملین تک کی بولی لگائیں گے کیونکہ یہ ٹیم اتنے میں ہی فروخت ہوگی لیکن خبر اب یہ ہے کہ اس بار پھر سے ملتان سلطانز کی 5 ملین سے زائد بولی لگے گی، انہوں نے کہا کہ یہ خبر ملنے کے بعد وہ دوبارہ اس پر غور و فکر کر رہے ہیں۔