دبئی(آئی این پی)انٹرنیشنل کرکٹ کونسل (آئی سی سی)نے سری لنکن آف سپنر اکیلا دانانجیا کے بائولنگ ایکشن کو غیر قانونی قرار دیتے ہوئے انہیں بین الاقوامی کرکٹ میں بائولنگ کرانے سے روک دیا ہے۔دانانجیا کا بالنگ ایکشن انگلینڈ اور سری لنکا کے درمیان کھیلے گئے پہلے ٹیسٹ میچ کے دوران

رپورٹ ہوا جس میں انگلینڈ نے 211رنز سے فتح حاصل کی۔ ایکشن رپورٹ ہونے کے بعد برسبین میں ان کا انفرادی ٹیسٹ کیا گیا جس میں انکشاف ہوا کہ ان کا بائولنگ ایکشن آئی سی سی کی قانونی حد 15ڈگری سے تجاوز کر رہا ہے۔آئی سی سی کی جانب سے جاری ہونے والے بیان میں کہا گیا ہے کہ انفرادی معائنے میں یہ بات سامنے آئی ہے کہ سری لنکن آف سپنر اکیلا دانانجیا کا بائولنگ ایکشن غیر قانونی ہے جس کے باعث فوری طور پر انہیں بین الاقوامی کرکٹ میں بالنگ سے روک دیا گیا ہے۔اکیلا دانانجیا ناصرف بین الاقوامی کرکٹ میں بالنگ نہیں کروا سکیں گے بلکہ تمام ممالک کی نیشنل فیڈریشن بھی اس فیصلے پر عملدرآمد کی پابندی ہوں گی البتہ وہ سری لنکن کرکٹ بورڈ کی اجازت سے سری لنکن ڈومیسٹک سیزن میں بالنگ کرانے کے مجاز ہوں گے۔25سالہ آف سپنر نے سری لنکا کی جانب سے فروری میں ٹیسٹ کرکٹ ڈیبیو کیا جس کے بعد وہ اب تک 5 ٹیسٹ میچوں میں اپنے ملک کی نمائندگی کر چکے ہیں تاہم اب اس پابندی کے خاتمے کیلئے انہیں لازمی طور پر اپنا بالنگ ایکشن تبدیل کرنا ہو گا۔