لاہور(آئی این پی) قومی جونیئر سلیکشن کمیٹی کے سربراہ باسط علی نے قومی ٹیم کو نئے اسٹارز پی ایس ایل سے حاصل ہونے کا تاثر مسترد کردیا۔اپنے ایک انٹرویو میں جونیئر سلیکشن کمیٹی کے سربراہ باسط علی نے کہاکہ نیا ٹیلنٹ سامنے لانے کا کریڈٹ ہمیشہ پی ایس ایل کو دیا جاتا ہے۔
جبکہ قومی ٹیم کو بیشتر نئے اسٹارز انڈر 19کرکٹ نے دیے ہیں، شاہین شاہ آفریدی اور شاداب خان اپنی جگہ بناچکے، روحیل نذیر، سعد خان، حسن محسن،نسیم شاہ اور موسی خان سمیت کئی ہونہار کرکٹرز انتظار میں ہیں لیکن میڈیا ہو یا سابق کرکٹرز کوئی کریڈٹ نہیں دیتا۔ جونیئر سطح کے میچز کم ہونے کی وجہ سے کھلاڑیوں کو صلاحیتیں نکھارنے کے مواقع نہیں ملتے، تمام تر توجہ سینئر ٹیم اور پی ایس ایل پر دی جاتی ہے۔باسط علی نے کہا کہ پاکستان کرکٹ کیلئے ایک تشویش کی بات یہ بھی ہے کہ جونیئر سطح پر اچھے بیٹسمین سامنے نہیں آ رہے، کھلاڑی انڈر 13اور16کی سطح پر تو اچھے ٹیمپرامنٹ کا مظاہرہ کرتے ہیں لیکن بعدازاں ان کی سوچ بدل جاتی ہے۔سابق کرکٹر نے کہا کہ امام الحق، مصباح الحق اور معین خان کے بیٹے جونیئر سطح پر کھیل رہے ہیں لیکن انھوں نے سلیکشن معاملات میں کبھی مداخلت نہیں کی، انضمام کے ساتھ میرے گھریلو مراسم ہیں،سفارش کے الزام میں کوئی صداقت نہیں تھی۔
