اسلام آباد (این این آئی) پاکستان فٹ بال فیڈریشن کی صدارت کے امیدوار اور خیبر پختونخوا فٹ سال ایسوسی ایشن کے صدر سید ظاہر علی شاہ نے پاکستان فٹ بال فیڈریشن کے انتخابات میں نامزدگی فارم جمع کروانے کے سلسلہ میں اپنے گروپ کا ایک اہم اجلاس ( آج ) بدھ کو اسلام آباد میں طلب کر لیا ہے۔

سید ظاہر علی شاہ نے بتایاکہ اجلا س میں باہمی صلاح مشورے سے امیدواروں کے نامزدگی فارم پاکستان فٹ بال فیڈریشن کے انتخابات میں حصہ لینے کیلئے جمع کروائے جائیں گے، نامزدگی فارم جمع کروانے کا (آج)جمعرات کو آخری دن ہے۔ پاکستان فٹ بال فیڈریشن کے انتخابات 12 دسمبر کو سپریم کورٹ بلڈنگ اسلام آباد میں ہونگے، جس میں پاکستان فٹ بال فیڈریشن کے ساتھ منسلک ورٹر اپنے حق دہی کا استعمال کر سکیں گے، تفصیلات کے مطابق پاکستان فٹ بال فیڈریشن کی ورٹر لسٹ پہلے ہی جاری کردی گئی ہے، ورٹر لسٹ کے مطابق پاکستان فٹ بال فیڈریشن کی کانگریس 23 ارکان پر مشتمل ہے جن میں پنجاب سے سردار محمد نوید حیدر خان، ملک محمد عامر ڈوگر اور فقیر محمد، سندھ سے سید خادم علی شاہ، سلیم شیخ اور انور قریشی، خیبر پختونخوا سے سید ظاہر علی شاہ، محمد نعمان اور محمد سلیم، بلوچستان سے حاجی سعید احمد، ایاز ظہور اور میر محمد جان مری، اسلام آباد فٹ بال ایسوسی ایشن سے چوہدری محمد سلیم، پاکستان واپڈا سے لیفٹیننٹ کرنل(ر) راجہ آصف مہدی، پاکستان ریلوے سے نور الدین داور، پی آئی اے سے سید بشارت علی، پاکستان پولیس سے وسیم احمد خان، ہائر ایجوکیشن کمیشن سے محمد فیصل بٹ، پاکستان آرمی سے میجر سید غیور علی ہمدانی ،پاکستان ائیرفورس سے گروپ کیپٹن ناشر خان، پاکستان نیوی سے کیپٹن ناصر محمود، پاکستان ریفری ایسوسی ایشن سے قاضی آصف اور قومی ویمن چیمپیئن پاکستان آرمی سے مس نیشا اشرف شامل ہیں۔