لاہور (مانیٹرنگ ڈیسک)  پاکستان سپر لیگ سیزن تھری کے کوالیفائر میں اسلام آباد یونائیٹڈ کے ہاتھوں شکست کے بعد کراچی کنگز کی ٹیم پلے آف مرحلے میں شرکت کیلئے دبئی سے لاہور پہنچ گئی۔کنگز کی ٹیم نجی ایئر لائن کی پرواز کے ذریعے دبئی سے علامہ اقبال انٹرنیشنل ایئرپورٹ لاہور پہنچی، اس موقع پر ایئر پورٹ پر سخت سکیورٹی انتظامات کیے گئے تھے، کھلاڑیوں کو فول پروف سکیورٹی حصار میں ہوٹل منتقل کیا گیا۔ واضح رہے کہ دبئی میں کھیلے جانے والے کوالیفائر میچ میں

اسلام آباد یونائیٹڈ نے کراچی کنگز کو یک طرفہ مقابلے میں 8 وکٹ سے شکست دی تھی۔لاہور میں پی ایس ایل کے پلے آف مرحلے میں 2ایلیمنیٹر میچز 20اور 21مارچ کو کھیلے جائیں گے، پہلا میچ تیسری اور چوتھی پوزیشن پر موجود پشاور زلمی اور کوئٹہ گلیڈی ایٹرز کی ٹیموں کے مابین ہو گا، جبکہ پہلے ایلیمنیٹر کی فاتح ٹیم 21مارچ کو لاہور میں کراچی کنگز سے مقابل ہو گی، اس مقابلے کی فاتح ٹیم 25مارچ کو کراچی میں شیڈول فائنل میں اسلام آباد یونائیٹڈ کے خلاف نبرد آزما ہو گی۔