کراچی (مانیٹرنگ ڈیسک)پاکستان سپر لیگ (پی ایس ایل) کی فرنچائز کراچی کنگز کے مالک سلمان اقبال نے دعویٰ کیا ہے کہ رواں برس ہونے والے ایونٹ میں 98 فیصد غیر ملکی کھلاڑیوں نے پاکستان آکر کھیلنے کو تیار ہیں۔کراچی کنگز کی کِٹ کی تقریبِ

رونمائی کے دوران گفتگو کرتے ہوئے انہوں نے کہا کہ اگر ان کی ٹیم پی ایس ایل 2018 کے پلے آف مرحلے کیلئے کوالیفائی کرتی ہے تو اس صورت میں ٹیم کے تمام غیر ملکی کھلاڑی پاکستان میں کھیلنے کیلئے تیار ہوں گے۔انہوں نے بتایا کہ ان کی ٹیم کے 7 غیر ملکی کھلاڑیوں میں سے 6 پاکستان آکر کھیلنے کیلئے تیار ہیں جبکہ انگلش کپتان ایون مورگن مصروفیات کی وجہ سے لیگ میں دیر سے شرکت کریں گے اور مصروفیات کی وجہ سے ہی پلے اذف سے پہلے ٹیم کو چھوڑ کر روانہ ہوجائیں گے۔انہوں نے کہاکہ یہ بہت خوش آئند بات ہے کہ غیر ملکی کھلاڑیوں نے پاکستان آکر کھیلنے پر رضامندی کا اظہار کردیا تاہم امید ہے کہ پاکستان میں سب کچھ اطمینان بخش رہے۔عماد وسیم کو کراچی کنگز کا کپتان بنانے کے حوالے سے سلمان اقبال نے کہا کہ گزشتہ دو ایونٹس کے دوران کراچی کنگز نے کئی کپتان تبدیل کیے تاہم اس مرتبہ ٹیم مینجمنٹ نے فیصلہ کیا ہے کہ ٹیم کو ایک نوجوان کپتان کی ضرورت ہے جو لمبے عرصے تک ٹیم کی قیادت کرکے اپنی صلاحیتوں کا لوہا منواسکے جو کراچی کنگز کے ساتھ ساتھ پاکستان کی بین الاقوامی ٹیم کے لیے بھی فائدہ مند ہوگا۔خیال رہے کہ رواں برس 22 فروری سے شروع ہونے والے پی ایس ایل تھری میں ایونٹ کے پلے آف مقابلے لاہور کے قذافی اسٹیڈیم جبکہ فائنل کراچی کے نیشنل اسٹیڈیم میں کھیلے جائیں گے۔