لاہور (مانیٹرنگ ڈیسک) سوئی ناردرن گیس کمپنی لاہور ریجن نے پاک سری لنکا ٹی ٹونٹی میچ کے دوران سکیورٹی پلان کی بنیاد پر قذافی سٹیڈیم کے اطراف میں ریسٹورنٹس کے گیس کنکشن منقطع کر دیئے۔بتایا گیا ہے کہ پاکستان اور سری لنکا کے درمیان آخری ٹی ٹونٹی میچ کل اتوار کے روز قذافی سٹیڈیم میں ہوگا جس کے لئے تمام اداروں اور محکموں نے انتظامات کو حتمی شکل دے دی ہے، سکیورٹی پلان کو مد نظر رکھتے ہوئے سوئی ناردرن گیس
کمپنی لاہور ریجن کی ٹیموں نے قذافی سٹیڈیم کے اطراف میں کمرشل مارکیٹ کے تمام کنکشن منقطع کر دیئے ہیں۔سوئی ناردرن حکام کے مطابق کنکشن منقطع کر کے سروس لائینز کو سیل کر دیا گیا ہے تاکہ گیس کے اخراج کی وجہ سے کسی بھی قسم کا ناخوشگوار واقعہ رونما نہ ہو سکے۔ حکام نے مزید بتایا کہ میچ کے دوران ایس این جی پی ایل کی ٹیمیں ڈیوٹی کے فرائض انجام دیں گی جبکہ سوموار کی صبح تمام گیس کنکشن بحال کر دیئے جائیں گے۔
پاکستان اور سری لنکا کے مابین ٹی ٹونٹی میچ کے لیے سکیورٹی اقدامات کے تحت قذافی اسٹیڈیم کے اطراف دکانیں اور شادی ہالز بند کرادیئے گئے۔تفصیلات کے مطابق پاکستان اور سری لنکا کے درمیان واحد ٹی ٹونٹی میچ کل ( اتوار) 29اکتوبر کو قذافی اسٹیڈیم میں کھیلا جائے گا جس کے لیے انتظامات کو حتمی شکل دی جاری ہے۔اس ضمن میں پاکستان کرکٹ بورڈ کے سکیورٹی حکام نے قذافی اسٹیڈیم کے اطراف شادی ہالز اور دکانیں ابھی سے بند کرادی ہیں جبکہ نشتر اسپورٹس کمپلیکس کو بھی جزوی طور پر بند کردیا گیا ہے۔قذافی اسٹیڈیم کے اطراف اور اندر سرچنگ کا عمل جاری ہے، فیروز پور روڈ، لبرٹی روڈ اور اسٹیڈیم کے قریب آنے والے راستوں کو بند کردیا گیا ہے جو میچ کی صبح کھولے جائیں گے۔
