کراچی(مانیٹرنگ ڈیسک) عید الاضحی کی آمد آمد ہے اور اسی حوالے سے ملک بھر میں عید قرباں کی تیاریاں پورے جوش و خروش کے ساتھ جاری ہیں۔ ایسے میں کرکٹر ، شوبز سمیت تمام مکاتب سے تعلق رکھنے والے افراد جانوروں کی خریداری میں دلچسپی لے رہے ہیں۔ مویشی منڈیوں کی رونقیں اور جانوروں کی خوبصورتی معروف قومی کرکٹر محمد یوسف کو بھی متاثر کئے بغیر نہ رہ سکی۔ محمد یوسف رات گئے سہراب گوٹھ کی منڈی مویشیاں سے ایک ملین(دس لاکھ) روپے کا بیل خرید لائے۔ تفصیلات

کے مطابق ’’بلیک کنگ‘‘ نامی بیل محمد یوسف کو اتنا پسند آیا کہ وہ انہوں نے دس لاکھ روپے کی خطیر رقم میں خرید لیا۔ خریداروں کیلئے مویشی منڈی میں کم سے کم 50 ہزار اور زیادہ سے زیادہ 65 لاکھ روپے تک کا جانور فروخت کیلئے موجود ہے ۔اس حوالے سے شہریوں کا کہنا ہے کہ جانوروں کی قیمتیں ان کی قوت خرید سے باہر ہیں۔ محمد یوسف کا اس حوالے سے کہنا ہے کہ وہ اللہ کی راہ میں بہترین جانور قربان کرنا چاہتے ہیں اور قربانی ایسی ہونی چاہئے جو اللہ رب العزت کو پسند آ جائے۔