لاہور(آئی این پی ) پاکستان کرکٹ بورڈ نے اسٹار بیٹسمین یونس خان کیلئے ریٹائرمنٹ کے بعد نئی ذمہ داری کا تعین کرلیا ۔ قومی ٹیم کے سابق کپتان یونس خان کو قومی انڈر 19 ٹیم کا مینٹور تعینات کرنے کا فیصلہ کیا ۔ نجی ٹی وی کے مطابق ٹیسٹ کرکٹر یونس خان کو ریٹائرمنٹ بعد اہم عہدہ دینے کا فیصلہ کرلیا گیا ہے اور وہ بطور مینٹور قومی انڈر 19 کرکٹ ٹیم کے خصوصی کیمپس اور بیرونی دوروں پر ٹیم کے ساتھ ہونگے۔
وا ضح رہے کہ یونس خان دورہ ویسٹ انڈیز کے بعد ٹیسٹ کرکٹ سے ریٹامنٹ کا اعلان کرچکے ہیں جبکہ ون ڈے اور ٹی 20 کرکٹ سے وہ پہلے ہی ریٹائرمنٹ لے چکے ہیں۔ انہوں نے ویسٹ انڈیز کیخلاف جاری سیریز میں ٹیسٹ کیریئر کے 10ہزار رنز کا سنگ میل عبور کیا ہے۔ یہ اعزاز حاصل کرنے والے وہ پاکستان کے پہلے اور دنیا کے 13 بیٹسمین ہیں۔ انہیں دنیا کے11 مختلف ممالک میں سنچریز اسکور کرنے کا منفرد اعزاز بھی حاصل ہے۔ یونس جنوری 2018 میں نیوزی لینڈ میں ہونے والے انڈر 19 ورلڈ کپ میں ٹیم کی رہنمائی کریں گے۔ دریں اثنا یونس خان نے ویسٹ انڈیز کے خلاف 2ٹیسٹ میچوں میں 9 کیچز لے کر بطور فیلڈر زیادہ کیچز کا توفیق عمر کا ریکارڈ برابر کر دیا ہے۔انہوں نے بارباڈوس کے دوسرے میچ میں 5 کھلاڑیوں کو کیچ پکڑ کر پویلین پہنچایا جن میں روسٹن چیز، وشال سنگھ، شین ڈارچ، برتھ ویٹ اور جیسن ہولڈر شامل ہیں۔
