بارباڈوس (این این آئی)ویسٹ انڈیز کے خلاف دوسرے ٹیسٹ میچ میں محمد عباس نے شاندار باؤلنگ کا مظاہرہ کر کے بارباڈوس میں وسیم اکرم کا 29 سالہ ریکارڈ توڑ دیا۔بارباڈوس میں کھیلے جا رہے سیریز کے دوسرے ٹیسٹ میچ میں محمد عباس نے ویسٹ انڈیز کے خلاف عمدہ باؤلنگ کا مظاہرہ کرتے ہوئے صرف 56 رنز کے عوض چار وکٹیں حاصل کیں اور اس کے ساتھ ہی وسیم اکرم سے منفرد ریکارڈ چھین لیا۔

کیریئر کا دوسرا ٹیسٹ میچ کھیلنے والے محمد عباس کی یہ کارکردگی بارباڈوس میں کسی بھی پاکستانی فاسٹ باؤلر کی اب تک کی سب سے بہترین باؤلنگ ہے۔اس سے قبل یہ ریکارڈ سابق کپتان اور مایہ ناز فاسٹ باؤلر وسیم اکرم کے پاس تھا جنہوں نے 1988 کے ٹیسٹ میچ میں 73 رنز کے عوض چار وکٹیں لی تھیں۔بارباڈوس میں پاکستان کی جانب سے بہترین باؤلنگ کا ریکارڈ آف اسپنر ثقلین مشتاق کے پاس ہے جنہوں نے 2000 میں اسی گراؤنڈ پر 121 رنز کے عوض پانچ وکٹیں لی تھیں۔