اسلام آباد(مانیٹرنگ ڈیسک) پاکستان سپر لیگ سے معطل ہونے والے شرجیل اور خالد لطیف واطن واپسی کے بعد لاپتہ ہو گئے ۔ تفصیلات کے مطابق پاکستان سپر لیگ سے معطل ہونے والے شرجیل اور خالد لطیف وطن واپسی کے بعد لاپتہ ہو گئے ہیں ۔دونوں معطل کھلاڑی گزشتہ روز کراچی پہنچے لیکن اس کے بعد سے دونوں کا کوئی پتا نہیں۔

پی سی بی ذرائع کا کہنا ہے کہ گزشتہ شب دونوں کھلاڑیوں کو نجی ائیر لائن کی پرواز کے ذریعے 10 بجے لاہور روانہ ہونا تھاجس کے لئے انہیں بورڈنگ پاس بھی مہیا کر دیئے گئے تھے لیکن دونوں کھلاڑی رات دو بجے تک کراچی ائیر پورٹ پر موجود رہے جس کے بعد سے دونوں لا پتا ہیں۔ذرائع نے تصدیق کرتے ہوئے بتایا ہے کہ دونوں کھلاڑی تاحال اپنے گھروں کو بھی نہیں پہنچے۔ معطل ہونے والے اسلام آباد یونائیٹڈ کے فاسٹ باؤلر محمد عرفان بھی آج وطن پہنچ رہے ہیں۔اس سے قبل شرجیل خان اور خالد لطیف اور چیئرمین پی سی بی ایک ہی فلائٹ پر دبئی سے کراچی پہنچے تھے۔ میڈیا سے گفتگو کے دوران چیئرمین پی سی بی شہریار خان نے کہا تھا دونوں کرکٹرز ان کے ساتھ فلائٹ میں تھے لیکن غصے کی وجہ سے وہ ان سے نہیں ملے اور نہ ہی کوئی بات کی ان کا کہنا تھا کہ پی سی بی کا ماننا ہے کہ شرجیل خان اور خالد لطیف کے خلاف کرپشن کے ثبوت ہیں۔