سڈنی(آئی این پی)ڈیوڈ وارنر نے ٹیسٹ کرکٹ میں تاریخ رقم کر دی ، دوسرے نمبر آگئے , آسٹریلوی اوپنرڈیوڈ وارنر نے ٹیسٹ کرکٹ تاریخ کی دوسری تیز ترین نصف سنچری بنا دی۔ڈیوڈ وارنر نے یہ اعزاز پاکستان کے خلاف سڈنی ٹیسٹ کی دوسری اننگز میں حاصل کیا، وارنر نے 50 رنز کی تکمیل کے لئے صرف 23 گیندوں کا استعمال کیا، انہوں نے یاسر شاہ کو چھکا لگا کر ففٹی بنائی
اس دوران 7 چوکے اور3 چھکے کھیل پر ان کی مکمل دسترس کا ثبوت تھے۔ پاکستانی کپتان مصباح الحق 21 بالز پر ففٹی کے ساتھ ورلڈ ریکارڈ کے حامل ہیں، انہوں نے 2014۔15 کے آسٹریلیا سے ابوظبی ٹیسٹ میں یہ کارنامہ انجام دیا تھا۔
جبکہ اس سے قبل آسٹریلوی بیٹسمین میٹ رینشا سر پر گیند لگنے کے سبب سڈنی ٹیسٹ میں مزید حصہ نہیں لے سکیں گے۔پاکستان سے میچ کے ابتدائی 3 روز میں دو بار گیند میٹ رینشا کے ہیلمٹ پر لگی تھی، پہلے روز جب وہ 91 رنز پر بیٹنگ کر رہے تھے تو عامر کے زوردار باؤنسر پر گیند لگنے سے ہل گئے مگر ٹیم ڈاکٹر نے انہیں کلیئر قرار دے دیا جس کے بعد انہوں نے سنچری مکمل کی تھی۔بعدازاں دوران فیلڈنگ تیسرے روز سرفراز احمد کے زوردار شاٹ پر گیند پھر ان کے ہیلمٹ پر لگی، تھوڑی دیر بعد انہیں سر میں درد کی وجہ سے میدان سے باہر جانا پڑا، رینشا کے میڈیکل ٹیسٹ جاری ہیں اور انہیں چند روز آرام کرنا ہوگا۔