میلبورن (آن لائن) قومی کرکٹ ٹیم کو میلبورن ٹیسٹ میں آسٹریلیا کے ہاتھوں بدترین شکست کا سامنا کرنا پڑا ہے اور اس کیساتھ ہی اس نے اپنا 16 سالہ پرانا شرمناک ترین ریکارڈ بھی برابر کر دیا ہے۔تفصیلات کے مطابق ٹیسٹ کرکٹ کی دنیا میں نمبر ون ٹیم بننے کے بعد پاکستان ٹیسٹ ٹیم زوال پذیر ہے اور اب تک مسلسل 5 ٹیسٹ میچ ہار کر 16 سالہ پرانی تاریخ کو ایک بار پھر دہرا دیا ہے۔ قومی کرکٹ ٹیم اس سے قبل 1999۔2000ء میں مسلسل پانچ ٹیسٹ میچ ہاری تھی تاہم میلبورن ٹیسٹ میں شکست کے بعد یہ زخم ایک بار پھر ہرا ہو گیا ہے اور شائقین کرکٹ سخت مایوسی اور غصے کا شکار ہیں۔
جبکہ دوسری جانب ٹیسٹ کرکٹ کی تاریخ میں پانچواں موقع ہے کہ کوئی ٹیم پہلی اننگز میں 400سے زائد رنز بنانے کے باوجود میچ ہار گئی ہو۔پاکستان میلبورن میں اس منفی ریکارڈ کا حصہ بنا، رواں ماہ انگلینڈ نے وینکھیڈے اور چنائی میں اسی انداز میں میزبان بھارت کے ہاتھوں مات کھائی تھی، اس سے قبل انگلینڈ 1930 اور سری لنکا 2011 میں پہلی اننگز میں 400 سے زائد رنز بنانے کے باوجودشکست کو نہ ٹال سکے تھے۔واضح رہے کہ میلبرن ٹیسٹ کی پہلی اننگز میں پاکستان نے 443 رنز بنائے تھے جس کے جواب میں آسٹریلیا نے 624 رنز بنائے جب کہ دوسری اننگز میں گرین کیپس 163 رنز تک محدود رہے اور اس طرح انہیں اننگز اور 18 رنز کی شکست کا سامنا کرنا پڑا۔