لاہور(آئی این پی)پاکستان کر کٹ بورڈ(پی سی بی) چیئرمین شہریار خان پڑھے لکھے کرکٹرز کی بات تو کرتے ہیں لیکن خود ان کے ناک کے نیچے اہم عہدے پر بیٹھے بلکہ کرسی سے چپکے عہدیدار کی ڈگری ابھی تک بورڈ میں جمع نہیں ہو سکی۔ عثمان واہلہ جو پی سی بی میں آنے سے پہلے پولو میچز پر کمنٹری کرتے تھے پھر بورڈ کے میڈیا سیل میں آئے اور اب پاکستان کی انٹرنیشنل کرکٹ کے تمام تر معاملات سنبھالتے ہیں۔ انہیں پی سی بی میں آئے چار سال سے زائد عرصہ گزر چکا ہے مگر ڈگری جمع نہیں کرا سکے۔ جون میں گورننگ بورڈ میٹنگ میں ان کے نام پر کافی شور مچا مگر موصوف کا اثرو رسوخ ہی اتنا تھا کہ انہیں چھ ماہ کا وقت دے دیا گیا۔ عثمان واہلہ کو دی گئی ڈیڈلائن گزر چکی ہے۔ تیس دسمبر کو ہونے والے پی سی بی کے اجلاس میں ڈائریکٹر انٹرنیشنل کرکٹ کے مستقبل کا فیصلہ ہو گا۔