لندن (آن لائن)دو مرتبہ ومبلڈن کی فاتح قرار پانے والی ٹینس کی کھلاڑی پیٹرا کویتووا کا کہنا ہے وہ ’خوش قسمت‘ ہیں کہ وہ گزشتہ روز ہونے والے حملے میں محفوظ رہیں۔26 سالہ پیٹرا کویتووا پر گزشتہ روز ایک شخص نے چاقو کا وار کر کے ان کے بائیں ہاتھ کو زخمی کر دیا۔ ان پر یہ حملہ ان کے آبائی ملک جمہوریہ چیک کے قصبے پروستیجوو میں اس وقت کیا گیا جب وہ اپنے گھر پر تھی۔کویتووا بائیں ہاتھ سے کھیلتی ہیں اور حملہ آور نے ان کے اسی ہاتھ کو نشانہ بنایا۔
کویتووا کا کہنا تھا کہ اس حملے نے ’مجھے ہلا کے رکھ دیا تھا۔
میرا زخم گہرا ہے اور مجھے کسی ماہر کو دکھانا پڑے گا۔‘ان کے ترجمان کے مطابق کویتووا پر حملہ اصل میں ان کے گھر پر ڈکیتی کی واردات تھی۔ترجمان کا کہنا تھا کہ ’یہ ڈکیتی کی کوشش کوئی سوچا سمجھا جرم نہیں تھا، اس کا مقصد خاص طور پر کویتووا کے گھر کو نشانہ بنانا نہیں تھا۔
عالمی سطح پر ٹینس کی خواتین کھلاڑیوں میں کویتووا کا نمبر 11واں ہے۔ وہ اب تک 19 ٹائیٹل جیت چکی ہیں جس میں سنہ 2011 اور 2014 کے گرینڈ سلیم ٹائیٹل بھی شامل ہیں۔حملے کے بعد ایک پیغام میں اپنے مداحوں کا شکریہ ادا کرتے ہوئے ان کا کہنا تھا کہ ’آپ کے ہمدردی کے پیغامات نے میرا دل گرما دیا ہے۔‘