برسبین (آئی این پی)پاکستان کرکٹ ٹیم کے مڈل آرڈر بیٹسمین اسدشفیق نے 13 چوکوں اور ایک چھکے کی مددسے 137رنزکی شاندار اننگز کھیل کر پاکستان کوبرسبین ٹیسٹ کی آخری اننگزمیں450رنزکا ریکارڈ مجموعہ دلانے میں کلیدی کردار اداکیا۔اس ایک اننگز نے اْنہیں کئی اعزازات کا مالک بنادیاہے جن کی تفصیل ذیل میں پیش کی جارہی ہے۔گاباکے برسبین کرکٹ گراؤنڈپر سب سے بڑی اننگزکھیلنے والے بیٹسمین بن گئے،اس سے قبل یہ اعزاز مشترکہ طورپر سنیل گواسکر اور شیرون کیمبل کے نام تھاجنہوں نے 113،113رنزکی اننگز کھیلی تھیں۔ ہدف کے تعاقب میں چھٹے یا اس سے نچلے نمبروں پر سب سے بڑی اننگزکھیلنے والے پاکستانی بلے باز بن گئے،اس سے قبل یہ ریکارڈ آصف اقبال کے نام تھا جنہوں نے 1977ء میں ویسٹ انڈیزکے خلاف کنگسٹن کے مقام پر 135رنز کی اننگز کھیلی تھی۔

مجموعی ٹیسٹ کرکٹ میں ان پوزیشنز پر آخری اننگزمیں بڑی اننگز کھیلنے میں صرف ایڈم گلکرسٹ اور ڈینئل ویٹوری ہی اسدشفیق سے آگے ہیں۔ 137رنزکی اننگزکھیل کر اسدشفیق ٹیسٹ ہسٹری میں چھٹے نمبرپر سب سے زیادہ9سنچریوں کے مالک بن گئے،اس سے قبل یہ ریکارڈویسٹ انڈیزکے عظیم بلے باز گیری سوبرزکے نام تھا ۔ اسد شفیق 137رنزکی اننگز کھیل کر حنیف محمد اور اعجازاحمد کے بعدمحض تیسرے پاکستانی بلے باز ہیں جنہیں آسٹریلوی سرزمین پر پہلے ہی ٹیسٹ میں سنچری بنانے کا اعزاز حاصل ہوا ہے۔ سعیدانورکے بعد محض دوسرے پاکستانی بلے باز ہیں جنہیں آسٹریلیا،انگلینڈاور جنوبی افریقہ جیسے تینوں ممالک میں سنچریاں اسکور کرنے کا اعزاز حاصل ہوا ہے۔ اسد شفیق ایشیاء سے باہر کھیلے گئے کسی بھی ٹیسٹ میچ کی چوتھی اننگزمیں سب سے بڑاانفرادی اسکوربنانے والے پاکستانی بلے باز بن گئے ہیں۔

موضوعات:اسد شفیق کرکٹ ٹیم مڈل آرڈر بیٹسمین