سڈنی (آئی این پی)سپا ٹ فکسنگ سکینڈل میں سزا مکمل کرنے والے محمد عامر کے بعد لیفٹ ہینڈ بلے باز سلمان بٹ کی قومی ٹیم میں ممکنہ واپسی کیخلاف صدائیں بلند ہونے لگیں۔سابق آسٹریلوی کر کٹرز ریان ہیرس اور مائیک ہسی نے سلمان بٹ کی قومی ٹیم میں ممکنہ واپسی کی شدید مخالفت کرتے ہوئے کہا ہے کہ سلمان بٹ کی انٹرنیشنل کر کٹ میں واپسی کے حق میں نہیں،سلمان بٹ اس وقت کپتان تھے اور انھوں نے اپنے کھلاڑیوں کو چیٹنگ کا حکم دیا، سلمان بٹ کی ٹیسٹ کرکٹ میں کوئی جگہ نہیں ہونی چاہیے

۔تفصیلات کے مطابق سلمان بٹ کی قومی ٹیم میں ممکنہ واپسی کیخلاف آوازیں بھی بلند ہونا شروع ہوگئیں۔ سابق آسٹریلوی کرکٹر ریان ہیرس نے کہا کہ میں سلمان بٹ کی واپسی کے حق میں نہیں ہوں، میں جانتا ہوں کہ اسی جرم میں شامل عامر اب ہمارے ملک میں کھیل رہے ہیں، میں سمجھتا ہوں کہ انھیں یہاں پر نہیں ہونا چاہیے تھا مگر یہ بھی ہے کہ جب جرم ہوا تب ان کی عمر 17 برس تھی، اس کے باوجود میرا دل اس دلیل کو ماننے پر تیار نہیں ہے لیکن جہاں تک سلمان بٹ کا معاملہ ہے وہ اس وقت کپتان تھے اور انھوں نے اپنے کھلاڑیوں کو چیٹنگ کا حکم دیا۔

سابق اسٹار بیٹسمین مائیک ہسی نے بھی اس معاملے میں ہیرس کے سخت موقف کی تائید کرتے ہوئے کہا کہ سلمان بٹ کی ٹیسٹ کرکٹ میں کوئی جگہ نہیں ہونی چاہیے، کچھ لوگ کہہ سکتے ہیں کہ انہوں نے بھی اپنی سزا پوری کرلی اور انہیں بھی عامر کی طرح موقع ملنا چاہیے مگر آپ کو یہ یادرکھنا چاہیے کہ عامر تب 17 سال کے بچے تھے اور انہیں سلمان بٹ نے ہی برے کاموں پر مجبور کیا، اس لیے مجھے فاسٹ بولر سے ہمدردی ہے لیکن سلمان کو انٹرنیشنل کرکٹ میں واپسی کی اجازت دینا بہتر نہ ہوگا۔