کراچی ( این این آئی) پاکستان نے ویسٹ انڈیز کے خلاف ٹیسٹ سیریز کے لیے 14 رکنی ٹیم کا اعلان کردیا جس میں ون ڈے سیریز میں بہترین کارکردگی کا مظاہرہ کرنے والے بابراعظم اور محمدنواز کو پہلی دفعہ شامل کیا گیا ہے جبکہ انگلینڈ کے خلاف ٹیسٹ ٹیم کا حصہ رہنے والے محمد حفیظ، محمد رضوان اور افتخاراحمد کو ڈراپ کر دیا گیا ۔ کراچی میں پریس کانفرنس کرتے ہوئے چیف سلیکٹر انضمام الحق نے پہلے ٹیسٹ کے لیے ٹیم کا اعلان کرتے ہوئے کہا کہ بابراعظم سے ٹیسٹ کرکٹ میں اچھی کارکردگی کی امید ہے۔انہوں نے کہا کہ میرا کسی سے کوئی ذاتی اختلاف نہیں ہے اور کسی بھی کھلاڑی کو خارج نہیں کیا ہے اس لیے جیسے حالات ہوں گے اسی طرح ٹیم میں شامل کیا جائے گا اور اس ٹیم کے انتخاب میں کوچ اور کپتان کی رائیبھی شامل ہے۔قومی ٹیم کے تجربہ کار بلے باز محمد حفیظ کو ٹیم میں جگہ نہیں دی گئی ہے جبکہ ون ڈے سیریز میں اپنے جوہر دکھانے والے بابر اعظم ٹیم میں ان کی جگہ لیں گے۔احمد شہزاد کو 3روزہ پریکٹس میچ میں موقع دیا ہے جبکہ سلمان بٹ اپنا پہلا سیزن کھیل ہے ہیں اور ہم انہیں مزید کھیلتے ہوئے دیکھنا چاہتے ہیں۔سلمان بٹ کی کارکردگی اچھی رہی تو اسے بھی موقع دیا جاسکتا ہے۔انضمام نے ٹیم سے اچھی کارکردگی کی توقع کرتے ہوئے کہا کہ ڈاکٹروں نے یونس خان کو دس دن آرام کا مشورہ دیا ہے اسی لیے وہ پہلے ٹیسٹ میں ٹیم کا حصہ نہیں ہوں گے تاہم دوسرے اور تیسرے ٹیسٹ میں وہ ٹیم کیساتھ ہوں گے۔یونس خان ڈینگی کی شکایت کے باعث کچھ دن قبل نجی ہسپتال میں داخل ہوئے تھے تاہم وہ صحت یابی کے بعد اپنے گھر واپس جاچکے ہیں۔محمد عامر والدہ کی طبیعت کی خرابی کے باعث ایک روزہ سیریز ادھوری چھوڑ کر واپس آئے تھے اب وہ پیر کو واپس متحدہ عرب امارات جائیں گے اور ٹیم کا حصہ ہوں گے۔ٹیسٹ ٹیم میں پہلی دفعہ شامل ہونے والے محمد نواز کے حوالے سے انضمام کا کہنا تھا کہ نواز کا فرسٹ کلاس کرکٹ میں اچھا ریکارڈ ہے جبکہ وہ اچھی بیٹنگ کے ساتھ بالنگ بھی اچھی کرتے ہیں۔ویسٹ انڈیز کے خلاف پاکستانی ٹیم ان کھلاڑیوں پر مشتمل ہوگی، یونس خان دوسرے ٹیسٹ سے ٹیم میں شامل ہوں گے جس کے بعد 15 رکنی ٹیم مکمل ہوگی۔مصباح الحق (کپتان)، اظہرعلی، سمیع اسلم، اسدشفیق، بابراعظم، محمدنواز، سرفرازاحمد، یاسرشاہ، محمد عامر، وہاب ریاض، سہیل خان، عمران خان، راحت علی، ذوالفقار بابرشامل ہیں۔پاکستان اور ویسٹ انڈیز کے درمیان سیریز کا پہلا میچ 13 اکتوبر کو شروع ہوگا جو ڈے اینڈ نائٹ کھیلا جائے گا اور یہ میچ دونوں ٹیموں کے لیے پہلا ڈے اینڈ نائٹ ٹیسٹ میچ ہوگا۔قبل ازیں پاکستان ٹیم نے ویسٹ انڈیز کو ٹی ٹونٹی اور ایک روزہ سیریز میں وائٹ واش شکست دی تھی اور قومی ٹیم ٹیسٹ سیریز میں بھی وائٹ واش کرکے درجہ بندی میں اپنی پہلی پوزیشن کو برقرار رکھنے کا عزم ظاہر کرچکی ہے۔