لاہور(آئی این پی)پاکستا ن ون ڈے ٹیم کے کپتان اظہر علی نے انگلینڈ کیخلاف ون ڈے سیریز میں تاریخ کا سب سے زیادہ ٹوٹل بننے پر اپنی غلطیوں کا اعتراف کر تے ہوئے کہا ہے کہ انگلینڈ کیخلاف تیسرے ون ڈے میں وکٹ بیٹنگ کیلئے سازگار اور بلے بازوں کیلئے جنت تھی ، ہم نے دبا ؤمیں غلطیاں کیں جس سے انگلینڈ کو بہت زیادہ رنز بنانے کے لیے کھلی چھٹی ملی۔ اپنے ایک انٹرویومیں اظہر علی نے کہا کہ رنز کی رفتار کو پاکستان کی جانب سے بہتر فیلڈنگ کے ذریعے روکا جاسکتا تھا۔ اظہرعلی نے اعتراف کیا کہ ‘ہم نے دو وکٹیں نو بال میں حاصل کیں اور مواقع ضائع کردیے، ایک مضبوط بیٹنگ کے خلاف آپ اس طرح کی غلطیوں کے متحمل نہیں ہوسکتے۔گزشتہ ورلڈ کپ کے بعد مصباح الحق کی جگہ قومی ٹیم کی کمان سنبھالنے والے اوپننگ بلے باز اس میچ کی غلطیوں کو بیان کرنے میں بالکل نہیں ہچکچائے کہ ‘ٹیبل پر سب سے بڑا مجموعہ ترتیب پاچکاتھا’۔شرجیل خان نے پہاڑ جیسے ہدف کا حوصلہ بخش جواب دیا اور دوسرے اوپنر سمیع اسلم اور کپتان کے ابتدائی 10 اوورز میں پویلین لوٹنے کے باوجود 30 گیندوں پر 12 چوکوں اور ایک چھکے کی مدد سے 58 رنز بنائے۔شرجیل خان کی مدد سے پاکستان نے ابتدائی 10 اوورز میں83 رنز بنائے لیکن مڈل آرڈر اننگز کو بہتربنانے میں ناکام ہوا۔اظہرعلی نے کہا کہ اگر آپ نے دیکھا ہوتو ہم نے اچھا آغاز کیا ،تاہم انھوں نے واضح کیا کہ جب آپ کو شروع سے ہی 8سے 9 رنز کی اوسط برقرار رکھنا ہو تو بڑا دباہوتا ہے۔پاکستان کو اس میچ میں 169 رنز سے شکست ہوئی تھی۔