اسلام آباد (مانیٹرنگ ڈیسک) بھارت کی ٹیسٹ ٹیم کے کپتان اور مایہ ناز بلے باز ویرات کوہلی نے کہا ہے کہ بھارت پاس ٹیسٹ کرکٹ کی بہترین ٹیم بننے کا نادر موقع ہے اور ہوم سیزن اپنی بالادستی قائم کرنے کا بہترین موقع ہے۔27 سالہ کرکٹر نے بھارت کے ٹیسٹ کرکٹ میں 500ویں ٹیسٹ میچ سے قبل کہا کہ میرا موقف ہے کہ ہمارے پاس دنیا کی بہترین ٹیم کی تمام تر صلاحیتیں موجود ہیں ٗبس ہمیں خود پر یقین کرنے کی ضرورت ہے اور انٹرنیشنل کرکٹ میں آنے والے نوجوان کھلاڑیوں میں اسی چیز کی کمی ہے۔انہوں نے کہا کہ اگر آپ بے خوف ہو کر کھیلیں تو اکثر نتائج آپ کے حق میں برآمد ہوتے ہیں کیونکہ آپ وہ اضافی خطرہ لینے کیلئے تیار ہوتے ہیں اور مجھے لگتا ہے کہ اس ٹیم میں بہترین بننے کی تمام چیزیں موجود ہیں۔انہوں نے کہا کہ ہماری ٹیم مستقبل میں کہاں کھڑی ہو گی، اس کی بنیاد ہم اس سیزن میں رکھیں گی ٗہم نے گزشتہ سال متحد رہتے ہوئے فتوحات حاصل کیں اور اب اس تسلسل کو برقرار رکھنا سب سے اہم چیز ہے۔