اسلام آباد(مانیٹرنگ ڈیسک) انگلینڈ کرکٹ بورڈ کی جانب سے دورہ بنگلہ دیش کے لئے ٹیم میں شامل کھلاڑیوں کے ناموں کا اعلان کر دیا گیا ہے۔ جس میں تاریخ میں پہلی بار چار پاکستانی نژاد کھلاڑیوں کو شامل کیا گیا ہے۔
تفصیلات کے مطابق انگلینڈ اینڈ ویلز کرکٹ بورڈ کی جانب سے آئندہ ماہ سے شروع ہو نے والے انگلینڈ کرکٹ ٹیم کے دورہ بنگلہ دیش جس میں تین ایک روزہ اور دو ٹیسٹ میچ کھیلے جائیں گے کے لئے تین نئے کھلاڑیوں کو شامل کیا گیا ہے جن میں 19 سالہ اوپننگ بلے باز حسیب حمید اور آل راؤنڈر ظفر انصاری اور بین ڈکٹ شامل ہیں۔ سرے کاؤنٹی کی جانب سے کھیلنے والے گیرتھ بیٹی کی بھی گیارہ سال بعد قومی ٹیم میں واپسی ہوئی ہے ۔
حسیب حمید انگلینڈ کی انڈر 19 کرکٹ ٹیم کے کپتان بھی رہ چکے ہیں اور اگر وہ چٹاکانگ میں کھیلے جانے والے پہلے میچ میں ہی برطانیہ کی نمائندگی کرنے کا اعزاز حاصل کرتے ہیں تو وہ 1949 کے بعد برطانیہ جانب سے 20 سال سے کم عمر میں نمائندگی کرنے والے دوسرے کھلاڑی بن جائیں گے۔ لنکا شائر کی جانب سے کھیلنے والے نوجوان اوپنر رواں سال کے کاؤنٹی سیزن میں 52 کی اوسط سے 1129 رنز بنا چکے ہیں۔ انہیں ایلکس ہیلز کو دورے سے الگ کرنے کے بعد ان کی جگہ پر ٹیم میں شامل کیا گیا ہے جو کہ سیکیورٹی وجوہات کی بنا پر بنگلہ دیش کے دورے میں شامل نہیں ہیں۔
اس طرح اس دورے میں تاریخ میں پہلی بار چار پاکستانی نژاد کھلاڑی انگلینڈ کی نمائندگی کریں گے جن میں معین علی، عادل رشید، حسیب حمید اور ظفر انصاری شامل ہیں۔
