لاہور( این این آئی) چار روزہ کیمپ میں سیریز کے لئے منتخب کھلاڑیوں کے فائن ٹیوننگ بولنگ، بیٹنگ اورفیلڈنگ میں بہتری کی کوشش کی جائے گی۔ کپتان سرفراز احمد کا کہنا ہے کہ ویسٹ انڈیز مختصر طرز کی خطرناک ٹیم ہے۔ لیکن ہمارے پاس ایسے کھلاڑی موجود ہیں۔ جو ان کے خلاف فتح سے ہمکنارکرسکتے ہیں۔متحدہ عرب امارات میں ٹونٹی ٹونٹی چمپئن ویسٹ انڈیز سے سیریز کی تیاری کے لئے پاکستان کرکٹ بورڈ نے مختصر تربیتی کیمپ لگانے کا فیصلہ کر لیا ، عید کے بعد سیریز کے لئے منتخب 15کھلاڑیوں کی کیمپ کے دوران فائن ٹیوننگ کی جائے گی ۔تفصیلات کے مطابق یواے ای میں پاکستان اور ویسٹ انڈیز کے درمیان سیریز کا آغاز 23ستمبرسے تین میچوں پرمبنی ٹی ٹونٹی سیریز سے ہوگا۔ کیریبیئن ٹیم ٹونٹی ٹونٹی کرکٹ کی عالمی چمپئن ہے اور حال ہی میں فلوریڈا میں اس نے بھارت کے خلاف بیس بیس اوورز کرکٹ کا سب سے بڑا ٹوٹل 245 رنز بنایا۔ ورلڈ ٹی ٹونٹی فائنل میں انگلینڈ کے بین اسٹوکس کوآخری اوور میں مسلسل چارچھکے لگاکر ویسٹ انڈیز کو فاتح بنانے والے کارلوس براتھ ویٹ اب ویسٹ انڈیز کے ٹی ٹونٹی کپتان ہیں۔ چمپئن ٹیم سے اہم سیریز کی تیاری کے لئے پی سی بی نے عید کے بعد مختصر تربیتی کیمپ کے انعقاد کا فیصلہ کیاہے۔