لاہور(این این آئی ) پاکستان سپر لیگ کے دوسرے ایڈیشن کیلئے غیر ملکی کھلاڑیوں میں دلچسپی بڑھنے لگی، مزید 7غیر ملکی کھلاڑیوں نے کھیلنے پر آمادگی ظاہر کردی۔تفصیل کے مطابق پی ایس ایل کا دوسرا ایڈیشن آئندہ برس فروری میں کھیلا جائے گا۔ پہلے ایڈیشن کی کامیابی کے بعد دوسرے ایڈیشن کیلئے غیر ملکی کھلاڑیوں نے بھی دلچسپی ظاہر کی ہے۔ انگلینڈ سمیت دیگر ممالک سے تعلق رکھنے والے 7 کھلاڑیوں نے شمولیت کی تصدیق کرتے ہوئے ڈرافٹنگ کیلئے دستاویزات پر دستخط کر دیئے ہیں۔پی ایس ایل کی ڈرافٹنگ میں شامل ہونے والوں کھلاڑیوں میں معین علی، وائن پارنیل، سٹیفن فن، جیسن رائے، جیمز اینڈر سن، اینٹن ڈیویچ اور سٹیورٹ براڈ شامل ہیں۔ ان کھلاڑیوں نے اکتوبر میں دبئی میں ہونے والی ڈرافٹنگ میں شمولیت کی دستاویزات پر دستخط کر دئیے ہیں۔