ناٹنگھم(مانیٹر نگ ڈیسک)پانچ میچوں کی سیریز زندہ رکھنے کے لیے پاکستان کو آج تیسرے ون ڈے میں انگلینڈ کی ان فارم ٹیم سے جیت کا چیلنج درپیش ہے ، یہ میچ گرین شرٹس کے لیے بہت اہمیت کا حامل ہے کیونکہ یہ میچ ہارنے کی صور ت میں سیریز ہاتھ سے جانے کے ساتھ ساتھ ورلڈ کپ 2019ء کے کوالیفائنگ راؤنڈ سے بچنا مزید مشکل ہو جائے گا۔ٹیم کی فاسٹ باؤلر محمد عامر سے وابستہ کی گئی توقعات بھی ابھی تک پوری نہیں ہو سکیں، آج کے میچ میں حسن علی کی جگہ دراز قد فاسٹ باؤلر محمد عرفان کو شامل کیا جاسکتا ہے۔قومی ٹیم کے کھلاڑی محمد حفیظ انگلینڈ سے وطن واپس پہنچ گئے۔ محمد حفیظ نجی ائیرلائن کی پرواز کے ذریعے انگلینڈ سے لاہور کے علامہ اقبال انٹر نیشنل ائیر پورٹ پر پہنچے اور بعد ازاں اپنے گھر کیلئے روانہ ہو گئے۔ محمد حفیظ پریکٹس کے دوران زخمی ہو گئے جس کی وجہ سے انہیں ٹیم سے ڈراپ کیا گیا جبکہ ذرائع کا کہنا ہے کہ محمد حفیظ کو ناقص کارکردگی کی بنا ء پر سیریز سے آؤٹ کیا گیا۔ محمد حفیظ کی جگہ فاسٹ باؤلر محمد عرفان کو شامل کیا گیا ہے۔‎