لندن (آئی این پی) انگلینڈ کیخلاف ٹیسٹ سیریز میں بری طر ح ناکام رہنے والے محمد حفیظ کپتان مصباح الحق کو طعنے دینے لگے۔اوپننگ بلے باز کا کہنا ہے کہ مصباح الحق نے صرف ایک سنچری بنائی اور باقی میچز میں بری طرح ناکام رہے، آخری ٹیسٹ میں باہر بٹھاکر زیادتی کی گئی، جب کنڈیشنز کی سمجھ آئی تو ڈراپ کردیا گیا۔تفصیلات کے مطابق محمد حفیظ نے آخری ٹیسٹ سے ڈراپ ہونے اور اپنی مایوس کن کارکردگی کے جواز تراش دئیے اوپنر محمد حفیظ انگلینڈ کے خلاف ٹیسٹ سیریز کے ابتدائی تین میچز کی 6 اننگز کے دوران ایک بار بھی 50 کا ہندسہ عبور نہیں کرپائے جس کی وجہ سے انہیں اوول ٹیسٹ سے باہر بٹھایا گیا، جس میں یونس خان کی ڈبل سنچری سے پاکستان نے کامیابی حاصل کرلی۔حفیظ سمجھتے ہیں کہ آخری ٹیسٹ میں انہیں باہر بٹھاکر ان سے زیادتی کی گئی، جب ان کو کنڈیشنز کی سمجھ آئی تو ڈراپ کردیا گیا، انہوں نے مصباح الحق پر بھی انگلی اٹھائی کہ انہوں نے صرف ایک سنچری بنائی اور باقی میچز میں بری طرح ناکام رہے۔ہفت روزہ اسپورٹس لنککو دیئے گئے اپنے تازہ انٹرویو میں ان کا کہنا تھا کہ انگلش وکٹوں پر کون کامیاب ہے، مصباح نے لارڈز ٹیسٹ کی پہلی اننگز میں سنچری بنائی اور پھر اگلی اننگز میں صفر پر آٹ ہوگئے، اظہر علی ناکام ہوئے شان مسعود ناکام رہا اوریونس خان کی کارکردگی بھی ابتدائی میچز میں اطمینان بخش نہیں رہی میں یہ نہیں کہتا کہ سب کو نکال دیں لیکن یہ ایک مسئلہ ہے جو صرف میرے ساتھ نہیں ہے میں نے بھی دو چالیس پلس کی اننگز کھیلی ہیں، بدقسمتی سے انہیں بڑی اننگز میں تبدیل نہیں کرسکا لیکن اس کا مطلب ہے کہ میں کنڈیشنز سے ہم آہنگ ہورہا ہوں۔