لندن (این این آئی)کرکٹ کے معروف تجزیہ کار اور مصنف عثمان سمیع الدین نے کہا ہے کہ ایجبیسٹن ٹیسٹ میں پا کستانی ٹیم کی بیٹنگ اچھی رہی اور جو بیٹسمین آؤٹ بھی ہوئے وہ اپنی ہی غلطیوں سے آؤٹ ہوئے۔عثمان سمیع الدین بی بی سی اردو کے کرکٹ پر خصوصی فیس بک لائیو میں ناظرین کے سوالات کے جواب دے رہے تھے۔ یہ فیس بک لائیو پاکستان اور انگلینڈ کے درمیان کھیلے جانے والے تیسرے ٹسٹ میچ کے دوران ایجبیسٹن کرکٹ گراؤنڈ برمنگھم سے کیا گیا۔عثمان سمیع الدین نے کہاکہ میچ میں فی الحال پاکستان کی پوزیشن اچھی ہے تاہم پاکستانی بولرز کو انگلش بیٹسمینوں پر پریشر برقرار رکھنے کیلئے لوز بولز سے پرہیز کرنا ہو گا۔یونس خان کے آؤٹ آف فارم ہونے کے بارے میں ایک کمنٹ کا جواب دیتے ہوئے عثمان سمیع الدین نے کہاکہ یونس خان جتنے بڑے بیٹسمین ہیں ٗان کی پرفامنس اور فارم کو ایک سیریز سے نہیں جانچا جا سکتا۔ انہوں نے کہاکہ یونس ابھی ایک سال مزید پاکستان کیلئے کھیل سکتے ہیں۔عثمان الدین نے کہاکہ نوجوان کھلاڑیوں کو مصباح الحق اور یونس خان کی مثالی فٹنس سے سبق سیکھنا چاہیے۔ انہوں نے کہاکہ یونس اپنی فٹنس کا اتنا خیال رکھتے ہیں کہ وہ مصالحے والی غذا کھاتے ہی نہیں اور رات کا کھانا وہ شام چھ بجے کھا لیتے ہیں۔