برمنگھم(نیوزڈیسک) تیسرا ٹیسٹ، پاکستان نے انگلینڈ کو پہلے دن ہی سرپرائز دیدیا،تیسرے ٹیسٹ میں انگلینڈ کے کھلاڑیوں کی جانب سے اننگز کا آغاز انتہائی مایوس کن تھا۔ انگلینڈ کی پہلی وکٹ 36 کے سکور پر گری جب ایلکس ہیلز سہیل خان کی گیند پر سرفراز احمد کے ہاتھوں کیچ آؤٹ ہو گئے۔ انہوں نے 17 رنز کی اننگز کھیلی۔ دوسرے آؤٹ ہونے والے کھلاڑی جوروٹ بھی سہیل خان کا شکار بنے۔ انہوں نے صرف تین رنز بنائے۔ پاکستان کیخلاف انگلینڈ کی تیسری وکٹ 75 رنز پر گری جب کپتان ایلسٹر کْک 45 رنز بنا کر راحت علی گیند پر ایل بی ڈبلیو ہو کر پویلین لوٹ گئے۔ اس کے بعد جیمز ونس اور گیری بیلنس نے اپنی ٹٰیم کو سہارا دیا اور سکور کو 100 رنز تک پہنچایا تاہم انگلینڈ کا سکور ابھی 144 رنز پر ہی پہنچا تھا کہ جیمز ونس 39 رنز بنا کر کیچ آؤٹ ہو گئے۔ انھیں بھی سہیل خان نے اپنی گیند سے نشانہ بنایا۔ پانچویں کھلاڑی جونی بیرسٹو کو سہیل خان نے آؤٹ کردیا وہ صرف بارہ رنز بناسکے۔واضح رہے کہ قومی ٹیم میں دو تبدیلیاں کی گئی ہیں۔ اوپنر شان مسعود کی جگہ سمیع اسلم جبکہ وہاب ریاض کی جگہ سہیل خان کو ٹیم میں شامل کیا گیا ہے۔ قومی ٹیم کے کپتان مصباح الحق کا ٹاس کے بعد میڈیا سے گفتگو میں کہنا تھا کہ وہ ٹیم کی کارکردگی کے حوالے سے پرامید ہیں۔ میچ میں کامیابی حاصل کر کے سیریز میں کم بیک کرنے کی کوشش کریں گے۔انگلینڈ نے اب تک چالیس اوورز میں 158رنز بنائے ہیں جبکہ اس کے پانچ کھلاڑی آﺅٹ ہوچکے ہیں، پاکستان کی جانب سے سہیل خان نے چارجبکہ راحت علی نے ایک وکٹ حاصل کی۔