لندن (مانیٹرنگ ڈیسک)پاکستانی نژاد برطانوی باکسر عامر خان نے انکشاف کیا ہے کہ وہ 13تیرہ سال سے ٹوٹے ہاتھ سے فائٹ کررہے ہیں اوراب تکلیف بڑھ گئی تھی اس لیے انھوں نے آپریشن کرالیا ہے اور وہ جنوری میں پوری طاقت کے ساتھ رنگ میں اترنے کیلئے پرجوش ہیں۔پاکستانی نژاد برطانوی باکسر عامر خان نے کہاکہ13سال پہلے ان کا ہاتھ ٹوٹ گیا تھا ٗ باکسنگ میں ورلڈ چمپئن بننے کیلئے انجری چھپائی رکھی اور تکلیف میں فائٹ کرتا رہاعامر خان نے کہا کہ انھوں نے انجری اس لیے چھپائی کہ وہ حریفوں کو اپنی کمزوری بتاکر نفسیاتی برتری دینا نہیں چاہتے تھے۔سابق چمپئن باکسر نے بتایا کہ انجری کے باعث وہ حریف کو صرف چالیس فیصد قوت سے مکا رسید کرتے تھے تاہم اب آپریشن کرالیا ہے اور رنگ میں سو فیصد کارکردگی دکھانے کیلئے پرجوش ہیں۔