میلبورن(این این آئی)خواتین سے چھیڑ چھاڑ کرس گیل کو مہنگی پڑ گئی،وہ ہوگیا جو وہم و گمان میں بھی نہ تھا،آسٹریلیا کی ٹی ٹوئنٹی لیگ بگ بیش کی ٹیم میلبورن رینیگیڈز نے ویسٹ انڈیز کے مایہ ناز بلے باز کرس گیل کو رواں سیزن کیلئے ٹیم میں شامل نہ کرنے کا اعلان کردیا ہے۔کرکٹ ویب سائٹ کرک بز کی رپورٹ کے مطابق میلبورن رینی گیڈز کے چیف ایگزیکٹیو اسٹورٹ کوونٹری نے بتایا کہ ہم اپنی ٹیم میں شامل غیر ملکی کھلاڑیوں کا اعلان جلد ہی کریں گے اور ان میں کرس گیل شامل نہیں۔میلبورن رینیگیڈز کے اس فیصلے کے ساتھ ہی کرس گیل کے بگ بیش میں شرکت کے امکانات بھی معدوم ہوگئے ہیں کیونکہ دیگر ٹیموں نے غیرملکی کھلاڑیوں کو شامل کرلیا ہے جبکہ کچھ ٹیموں کو گیل کے حصول پر دلچسپی نہیں ۔کرس گیل بگ بیش لیگ کے گزشتہ سیزن میں خاتون صحافی کے ساتھ ناشائستہ گفتگو کرنے پر سخت تنقید کا نشانہ بنے تھے جس پر انھیں معافی بھی مانگنا پڑی تھی جبکہ ان پر جرمانہ بھی کیا گیا تھا۔انڈین پریمیرلیگ (آئی پی ایل) میں کرس گیل رائل چیلنجرز بنگلور کی نمائندگی کررہے ہیں جہاں وہ حال ہی میں ایک دفعہ پھر اسی طرح کے الزامات کی ذد میں آئے ۔کرس گیل نے بگ بیش میں شرکت کی خواہش کا اظہار کرتے ہوئے کہا تھا کہ وہ سب کچھ بھلا کر ٹورنامنٹ میں شرکت کیلئے آسٹریلیا جانا چاہتے ہیں۔بگ بیش کے گزشتہ سیزن میں انھوں نے 32.5 کی اوسط سے 260 رنز بنائے تھے اور نمایاں کارکردگی 17 گیندوں پر 56 رنز تھی ٗ یوراج سنگھ کا 12 گیندوں پر ٹی ٹوئنٹی کی تیز ترین نصف سنچری بنانے کا ریکارڈ بھی برابر کردیا تھا۔