اسلا م آباد(این این آئی)پاکستان کی آئندہ ہوم سیریز،متحدہ عرب امارات کی چھٹی،نئے ملک کی منظوری دیدی گئی،پاکستان کرکٹ بورڈ (پی سی بی) نے رواں سال اکتوبر میں ویسٹ انڈیز کے خلاف سیریز کی میزبانی کے لیے سری لنکا کرکٹ سے رابطہ کرتے ہوئے سیریز پر آنے والے مالی اخراجات کی تفصیلات طلب کر لیں۔پاکستان اور ویسٹ انڈیز کے درمیان سیریز دو ٹیسٹ، تین ون ڈے اور دو ٹی ٹوئنٹی میچوں پر مشتمل ہے جو متحدہ عرب امارات میں شیڈول ہے تاہم اخراجات کی زیادتی کی وجہ سے پی سی بی نے سری لنکا کو میزبانی کے لیے متبادل کے طور پر چن لیا ہے۔پی سی بی نے سری لنکا کرکٹ سے سیریز کی میزبانی پر آنے والے مالی اخراجات کی تفصیلات طلب کی ہیں۔پی سی بی کے ترجمان نے کرکٹ ویب سائٹ کرک انفو کو دئیے گئے انٹرویو میں کہا کہ ہمیں متحدہ عرب امارات میں میچوں کی میزبانی سے بڑھتے ہوئے اخراجات پر تشویش ہے اور اگر سری لنکا ہمیں مناسب لگا تو ہم اس کو متبادل کے طور پر دیکھیں گے۔