اسلام آباد(نیوز ڈیسک ) ویسٹ انڈین کرکٹ بورڈ نے متحدہ عرب امارات میں شیڈول سیریز میں ڈے اینڈ نائٹ ٹیسٹ کھیلنے پر رضامندی ظاہر کردی ۔میڈیا رپورٹ کے مطابق پاکستان اور ویسٹ انڈیز کے درمیان ستمبر اکتوبر میں یو اے ای میں ٹیسٹ سیریز شیڈول ہے ٗ پاکستان نے سیریز میں کھیلے جانے والے دو ٹیسٹ میچوں میں سے ایک ڈے نائٹ ٹیسٹ کھیلنے کی تجویز پیش کی تھی۔پی سی بی چیئرمین کے مطابق میں نے ویسٹ انڈین کرکٹ بورڈ کی جانب سے آیا ہوا خط ابھی تک نہیں دیکھا تاہم بظاہر انہوں ے متحدہ عرب امارات میں پنک گیند کے ساتھ ڈے نائٹ ٹیسٹ کھیلنے کیلئے ہاں کردی ہے ٗاگر انتظامات کو حتمی شکل دے دی جاتی ہے تو یہ پاکستان اور ویسٹ انڈیز دونوں کا پہلا ڈے نائٹ ٹیسٹ میچ ہو گا۔دو ٹیسٹ میچوں کے علاوہ دونوں ٹیموں کے درمیان پانچ ایک روزہ اور دو ٹی ٹوئنٹی میچوں کی سیریز بھی کھیلی جائے گی۔