کراچی(نیوز ڈیسک )محسن حسن خان کوچنگ کی دوڑ سے باہر ہو گئے، شہریارخان کے کہنے پر وہ نجم سیٹھی سے اپنے ’’معاملات ٹھیک ‘‘ کرنے پر آمادہ تھے مگر عوامی سطح پر معذرت سے انکار کردیا۔
تفصیلات کے مطابق سابق ٹیسٹ اوپنر محسن خان کو چیئرمین پی سی بی شہریارخان نے چیف سلیکٹر بننے کی پیشکش کی تھی مگر انھوں نے اسے قبول نہ کیا، ان کا کہنا تھا کہ کوچ کی صورت میں گیا تھا اب وہی بن کر واپس آئوں گا، شہریارخان ان کیلیے نرم گوشہ رکھتے ہیں، انھوں نے کوچنگ کی پوسٹ سونپنے کا بھی سوچا مگر ایگزیکٹیو کمیٹی کے سربراہ نجم سیٹھی کے محسن خان سے تعلقات اچھے نہیں ہیں۔
سابق کرکٹر نے ٹی وی پر کئی بار انھیں تنقید کا نشانہ بنایا تھا، چیئرمین بورڈ نے محسن کو مشورہ دیا کہ وہ نجم سیٹھی سے اپنے ’’معاملات ٹھیک‘‘ کر لیں تاکہ کوچ بنانے کی راہ ہموار ہو جائے۔ وہ اس پر تیار بھی ہو گئے لیکن پھر ایگزیکٹیو کمیٹی چیف نے عوام سطح پر معذرت کا مطالبہ کیا تو محسن خان آمادہ نہ ہوئے، الٹا انھوں نے ایک اور پریس کانفرنس کر دی جس میں کوچ کی تلاش کے طریقہ کار پر ہی سوال اٹھا دیا۔
ذرائع نے بتایا کہ اب محسن خان کے کوچ بننے کا امکان تقریباً ختم ہو گیا ہے، شہریارخان انھیں مزید سپورٹ کرنے کو تیار نہیں ہیں، سابق کرکٹر عاقب جاوید بھی بورڈ سے ناراض ہو گئے اور اب درخواست نہیں دیںگے،ان دونوں کے سوا کوئی ہائی پروفائل امیدوار نظر نہیں آتا، یوں اس بات کا امکان روشن ہے کہ نیا کوچ کوئی غیرملکی ہی ہو، کوچ ہنٹ کمیٹی میں شامل سابق کرکٹرز وسیم اکرم اور رمیز راجہ بھی اسی کے حق میں ہیں، البتہ چیئرمین بورڈ نے ان سے کہا ہے کہ ابھی سے ذہن نہ بنائیں، درخواستیں جمع ہو جائیں تو ملکی ہو یا غیرملکی میرٹ پر کسی کے تقرر کی سفارش کریں۔