لاہور( نیوز ڈیسک)قومی کرکٹ ٹیم کے بلے باز محمد حفیظ نے کہا ہے کہ ٹی ٹونٹی ورلڈ کپ میں ناقص کارکردگی کی ذمہ داری کسی ایک پر نہیں ڈالی جا سکتی ،میرے سمیت سب اس کے ذمہ دار ہیں ،سچ بولنے والا شخص ہوں اور سچ بولوں گا ،میری انجری کے حوالے سے جو باتیں کی گئی ہیں اس پر تھوڑا انتظار کر لیں کھل کر بات کروں گا ، سرفراز احمد کو ٹی ٹونٹی کا کپتان بنانے کے فیصلے کی حمایت کرتا ہوں ۔ لاہور میں میڈیا سے گفتگو کرتے ہوئے محمد حفیظ نے کہا کہ ٹی ٹونٹی کی قیادت سونپے جانے پر سرفراز احمد اور ان کے اہل خانہ کو مبارکباد پیش کرتا ہوں اور تمام کھلاڑی انہیں سپورٹ کریں گے۔ انشا اللہ جلد پاکستان کی وہ ٹیم بنے گی جو عوام دیکھنا چاہتے ہیں ۔ انہوں نے ورلڈ کپ میں انجری کے حوالے سے کہا کہ سچ بولنے والا شخص ہوں اور سچ بولوں گا ۔ تھوڑا انتظار کر رہا ہوں کھل کر بات کروں گا ۔ انہوں نے ٹی ٹونٹی ورلڈ کپ میں ٹیم کی ناقص کارکردگی کے حوالے سے سوال کے جواب میں کہا کہ اس کی ذمہ داری کسی ایک پر عائد نہیں کی جا سکتی اور سب بری پرفارمنس کی ذمہ داری لے رہے ہیں اور میں خود کو بھی سب سے بڑا ذمہ دار سمجھتا ہوں کیونکہ میں بھی اسی ٹیم کا حصہ تھا اور میں ایسی پرفارمنس نہیں دے سکا جس سے ٹیم جیت سکتی ۔ انہوں نے اپنے بالنگ ایکشن کی درستگی کے حوالے سے سوال کے جواب میں کہا کہ میں اپنی بھرپور پریکٹس جاری رکھے ہوئے تھا لیکن انجری کی وجہ سے کچھ تعطل آیا ہے لیکن اس سلسلہ کو جلد دوبارہ شروع کروں گا اور امید ہے کہ انگلینڈ کے دورہ سے قبل کم بیک کر لوں گا ۔انہوں نے ٹیم کی فٹنس کیلئے ایبٹ آباد میں کیمپ لگائے جانے کے حوالے سے سوال کے جواب میں کہا کہ یہ فیصلہ ابھی سامنے آیا ہے جب اس پر عملدرآمد ہوگا اوراس کے نتائج سامنے آئیں گے تبھی کچھ کہا جا سکتا ہے لیکن جو بھی بہتری کیلئے کیا جائے اس کی سپورٹ ہونی چاہیے ۔