کولکتہ(نیوز ڈیسک) پاکستان کرکٹ ٹیم کے بلے باز محمد حفیظ نے کہا ہے کہ بنگلا دیش کے خلاف ٹیم کو اچھا آغاز فراہم کر کے بڑے ٹوٹل کی بنیاد رکھی اور کوشش ہو گی کہ آئندہ میچز میں بھی فارم برقرار رکھ سکوں۔میچ کے بعد اپنے انٹرویو میں محمد حفیظ نے کہاکہ گزشتہ کئی ماہ سے ٹی ٹوئنٹی میں اچھی کارکردگی نہیں دکھا پا رہے تھے تاہم یہ ٹورنامنٹ ایک علیحدہ ٹورنامنٹ ہے اس کے لئے تمام لڑکوں نے بہت محنت کی ہے اور یہی وجہ ہے کہ ہم نے وارم اپ میچ میں سری لنکا کے خلاف بھی اچھا پرفارم کیا تھا جس سے لڑکوں کو اعتماد ملا اور آج کے میچ میں بھی ٹیم کو اچھا آغاز فراہم کر کے بڑے ٹوٹل کی بنیاد رکھی اور 202 رنز کا ہدف دیا۔حفیظ نے کہاکہ ٹی ٹوئنٹی میں سلو وکٹ پر 200 سے زائد رنز کا ہدف اچھا ٹوٹل ہے تاہم میچ جیتنے کے لئے بھرپور محنت کرنا ہوگی اور ہمارے پاس فاسٹ اور اسپن بولنگ کا اچھا کمبی نیشن موجود ہے۔ ان کا کہنا تھا کہ کوشش کروں گا کہ ٹورنامنٹ کے اگلے میچز میں بھی اسی فارم کو برقرار رکھوں۔واضح رہے کہ محمد حفیظ نے بنگلا دیش کے خلاف ٹی ٹوئنٹی ورلڈ کپ کے دوسرے میچ میں 42 گیندوں پر 64 رنز کی اننگز کھیلی۔ اٹھارویں اوور میں تسکین احمد کی گیند پر شبیر رحمان نے ناقابل یقین کیچ پکڑ کر ان کی اننگز کا خاتمہ کیا۔