اسلام آباد (نیوز ڈیسک) پاکستانی ٹیم اس وقت بھارت میں میچ کھیلنے کیلئے مقیم ہے جہاں اسے سخت سیکورٹی میں رکھا گیا ہے ۔ تفصیلات کیمطابق پاکستانی ٹیم اگر10منٹ کیلئے بھی کہیں باہر جانا چاہے تو اسے 6گھنٹے پہلے سیکیورٹی اہلکاروں کو بتانا پڑتا ہے ۔جوکہ سخت تکلیف دہ بات ہے مگر مجموعی طور پر پاک ٹیم بھارت کے رویوں کے گن گا رہی ہے ۔
تفصیلات کے مطابق سیکیورٹی خدشات کی وجہ سے گرین شرٹس کی بھارت روانگی تاخیر کا شکار ہوئی، ٹیم اب کولکتہ میں مقیم ہے جہاں اسے بدھ کو بنگلہ دیش سے ورلڈ ٹوئنٹی 20 کا پہلا میچ کھیلنا ہوگا، ذرائع نے بتایا کہ آمد کے بعد سے پاکستانی کرکٹرزصرف پریکٹس یا وارم اپ میچ کھیلنے ہی ایڈن گارڈنز گئے ہیں، اس کے علاوہ باہر جانے کا موقع نہیں ملا، پہلے دن ٹیم نے اکھٹے ریسٹورنٹ میں کھانا کھایا تھا مگر اس کے بعد کمروں میں ہی مختلف گروپس کی صورت میں لنچ یا ڈنر کرتے ہیں۔
پلیئرز باہر جانے سے اس کیلیے بھی گریزاں ہیں کہ چاہے 10،15منٹ کیلیے بھی جانا ہو منتظمین نے انھیں 6 گھنٹے قبل آگاہ کرنے کی ہدایت دی ہے، اس صورت میں وہ سیکیورٹی انتظامات کر سکیں گے، دوسری جانب پاکستانی ٹیم بھارت کی جانب سے فراہم کردہ سیکیورٹی سے مطمئن دکھائی دیتی ہے، وہ جس فلور پر مقیم ہے وہاں کسی غیر متعلقہ فرد کو آنے کی اجازت نہیں،کھلاڑی بھی خاصے محتاط انداز میں رہتے ہوئے دوستوں تک سے ملاقاتوں سے گریز کر رہے ہیں۔
بھارت میں پاکستان مخالف جذبات کی فضا کے باوجود گرین شرٹس اب تک عوامی رویے سے بیحد خوش ہیں، اسٹیڈیم میں شائقین نے پلیئرز کی خاصی حوصلہ افزائی بھی کی، انھیں توقع ہے کہ بدھ کو بنگلہ دیش سے میچ میں بھی کراو¿ڈ کی حمایت حاصل رہے گی۔