کولکتہ (نیوزڈیسک) قومی ٹی ٹوئنٹی ٹیم کے کپتان شاہد آفریدی نےبھارت کے حوالے سے بیان پر ہونے والی تنقید پر ناراضی کا اظہار کرتے ہوئے کہا ہے کہ ان کے بیان کو غلط انداز میں پیش کیا گیا جس پر افسوس ہے اور چند صحافی پیدا ہی غلط بیانی کیلئے ہوئے ہیں، صحافی کے سوال پر ڈپلومیٹک طریقے سے جواب دیا تھا۔ ورلڈ ٹی ٹوئنٹی میں شرکت کیلئےبھارت کے شہر کولکتہ پہنچنے کے بعد گزشتہ روز پریس کانفرنس سے خطاب کرتے ہوئے کہا تھا کہ ہندوستان میں ہم نے کرکٹ کو ہمیشہ بہت انجوائے کیا۔ ایک سوال کے جواب میں انہوں نے کہا کہ بھارت کے لوگوں سے ہمیں بہت پیار ملا ہے اور اتنا پیار تو ہمیں پاکستان میں بھی نہیں ملا جتنا یہاں ملا۔شاہد آفریدی کے اس بیان پر انہیں پاکستان بھر میں شدید تنقید کا نشانہ بنایا گیا اور سابق کھلاڑیوں نے بحیثیت کپتان ان سے ذمہ دارانہ بیان دینے پر زور دیا۔تاہم اس تمام صورتحال پر شاہد آفریدی نے افسوس کا اظہار کرتے ہوئے کہا کہ ان کے بیان کو غلط انداز میں پیش کیا گیا۔ ٹی ٹوئنٹی کپتان نے تازہ صورتحال پر سوشل میڈیا پر بیان دیا کہ لوگ ٹی وی پر تبصرے کرنے کے بجائے امن کی کوششیں کریں تو یقیناً امن قائم ہو جائے گا، افسوس کے کچھ صحافی معصومانہ بیان کو جان بوجھ کر غلط انداز میں پیش کرنے کیلئے ہی پیدا ہوئے، مثبت طرز عمل کا مظاہرہ کریں۔ مجھے سے صحافی نے سوال کیا تو میں نے ڈوپلومیٹک طریقے سے جواب دیاکیونکہ میں جانتا تھا کہ میرا یہ پیغام پوری دنیا میں جائیگا۔پوری دنیا میں کرکٹ کو بہت عز ت دی جاتی ہے۔ بھارت اور پاکستان کے درمیان ہمیشہ تعلقات کرکٹ کے ذریعے ہی بہتر ہوا ہے۔عمران خان ،وسیم اکرم اوردیگر پاکستانیوں نے ہمیشہ بھارت میں کھیل کر انجوائے کیا ۔ یہ پہلا موقع نہیں کہ آفریدی میڈیا سے گفتگو کے دوران تنازع کا شکار رہے ہوں بلکہ اس سے قبل بھی متعدد مرتبہ وہ تند و تیز جوابات کی وجہ سے میڈیا کی تنقید کا نشانہ بن چکے ہیں۔