ڈھاکہ (نیوزڈیسک)ایشیا کپ میں پاکستان کیخلاف میچ میں آئی سی سی قوانین کی خلاف ورزی پر بنگلہ دیشی آل راؤنڈر شکیب الحسن کو آفیشل سطح پر سرزنش کی گئی ہے۔بدھ کو پاکستان کے خلاف اہم میچ میں بیٹنگ کے دوران 18ویں اوور میں محمد عامر کی گیند پر آؤٹ ہونے کے بعد شکیب الحسن نے غصے میں آ کر وکٹوں پر بلا مارا تھا تاہم فوراً ہی امپائرز سے اپنے عمل کی معافی بھی مانگ لی تھی۔انہیں آئی سی سی کے قوانین کے تحت لیول 1 کو توڑنے کا مرتکب قرار دیا گیا جس میں ایک انٹرنیشنل میچ کے دوران کرکٹ کے سامان، کپڑوں، گراؤنڈ کے سامان یا دیگر منسلک سامان کو نقصان پہنچانا شامل ہے۔شکیب الحسن نے اپنی غلطی مانتے ہوئے میچ ریفری جیف کرو کی جانب سے سنائی گئی سزا کو تسلیم کر لیا جس کے بعد کسی رسمی سماعت کی ضرورت محسوس نہیں کی گئی ،ان پر یہ چارج فیلڈ امپائرز انیل چوہدری اور رچیرا پلیا گروگے، تھرڈ امپائر انعام الحق اور چوتھے آفیشل شوزاب رضا کی جانب سے لگایا گیا۔پہلے لیول کے قوانین کی خلاف ورزی کی صورت میں کھلاڑی کو کم از کم سرزنش اور زیادہ سے زیادہ 50 فیصد میچ فیس کی پینالٹی عائد کرنے کی سزا دی جا سکتی ہے۔