ڈھاکہ (نیوز ڈیسک)پاکستان کرکٹ ٹیم کے مینیجر انتخاب عالم نے کہا ہے کہ محمد عامر کی ٹیم میں واپسی کے موقع پر کچھ کھلاڑیوں کو انہیں قبول کرنے میں مشکل کا سامنا تھا تاہم اب ایسا کوئی مسئلہ نہیں رہا۔ ایک انٹرویو میں انہوں نے کہاکہ پوری ٹیم دل سے اب عامر کے پیچھے کھڑی ہے اور فاسٹ باؤلر کے اعتماد میں ہر میچ کے ساتھ اضافہ ہورہا ہے۔انتخاب نے کہا کہ پاکستان کرکٹ بورڈ (پی سی بی) نے عامر کی واپسی کے حوالے سے قوانین پر عمل کیا ‘ جن کھلاڑیوں کو فاسٹ باؤلر کی واپسی پر تحفظات تھے انہیں ہم نے سنا اور اپنی رائے بھی دی ‘اس کے بعد زیادہ وقت نہیں لگا اور اب ٹیم کا ہر رکن ایک صفحے پر ہے۔ اب کسی کھلاڑی کو عامر سے کوئی عداوت نہیں اور عامر کو اب ٹیم کے ہر رکن، سپورٹ اسٹاف اور پی سی بی کی حمایت حاصل ہے۔نیوزی لینڈ میں تماشائیوں کی جانب سے عامر پر جملے کسنے کے حوالے سے سوال پر انتخاب نے کہا کہ ٹیم اس کے لیے تیار تھی اور کھلاڑی اس سے پریشان نہیں ہوئے ہم ایسے واقعات کیلئے تیار تھے۔ جملے ولنگٹن کے اسٹیڈیم میں تماشائیوں کے ایک مخصوص حصے سے کسے جارہے تھے۔ ایک شائق نے تو عامر کو ڈالر بھی لہراکر دکھایا پھر محمد حفیظ نے انہیں بچایا اور سکیورٹی حکام کی توجہ اس جانب مبذول کروائی۔ایشیا کپ میں عامر کی تعریف کرتے ہوئے انہوں نے کہا کہ نوجوان فاسٹ باؤلر نے پاکستانی اٹیک میں نئی روح پھونک دی ہے۔عامر نے بین الاقوامی کرکٹ میں واپسی کے بعد مضبوط اعصاب کا مظاہرہ کیا اور میں ان کی کارکردگی سے بہت خوش ہوں۔عامر کے بھارت کیخلاف اسپیل نے پوری ٹیم کو حوصلہ دیا ‘وہ پریکٹس کے دوران سخت محنت کررہے ہیں اور ہماری ٹیم میں ترپ کے پتے کی حیثیت رکھتے ہیں۔انتخاب نے ویرات کوہلی کی بلے بازی کی وجہ سے بھارت کو ایشیا کپ جیتنے کے لیے مضبوط امیدوار قرار دیا۔کئی کھلاڑیوں نے اچھی کارکردگی کا مظاہرہ کیا تاہم کوہلی کی کارکردگی سب سے اچھی رہی۔