میرپور: ایشیا ٹی ٹوئنٹی کپ کے انتہائی اہم میچ میں بنگلہ دیش نے پاکستان کو پانچ وکٹ سے ہراکر فائنل میں جگہ بنالی، اب ایشیاءکپ کا فائنل بھارت اور بنگلہ دیش کے درمیان ہوگا،محمد سمیع نے اپنے آخری اوور میں دو نو بال کرا کر پاکستانی کرکٹ شائقین کی امیدوں پر پانی پھیر دیا،بنگلہ دیش میں جشن،تفصیلات کے مطابق میرپور کے شیر بنگلا اسٹیڈیم میں کھیلے گئے ایشیا ٹی ٹوئںٹی کپ کے انتہائی اہم میچ میں پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 129 رنز اسکور کیے جو بنگلہ دیش نے پانچ وکٹوں کے نقصان پر پورا کرلیا۔ تمیم اقبال اور سومیا سرکار نے اننگز کا آغاز کیا، تمیم نے پہلے ہی اوور میں محمد عامر کو چھکا رسید کرکے اپنے ارادے ظاہر کی لیکن دوسرے ہی اوور میں عرفان نے انہیں 7 رنز پر پویلین بھیج دیا جس کے بعد سومیا نے شبیر رحمان کے ساتھ ملکر 33 رنز کی شراکت داری قائم کی، شبیر 14 رنز بنا کر آو¿ٹ ہوئے جب کہ سومیا نے مشفق الرحیم کے ساتھ ملکر 37 رنز بنائے، سومیا 48 رنز کی اننگز کھیل کر آو¿ٹ ہوئے جب کہ مشفق الرحیم 12 رنز ہی بناسکے۔ شکیب الحسن کو 8 رنز پر محمد عامر نے بولڈ کیا تو انہوں نے غصے سے وکٹوں پر بلا مار دیا تاہم بعد میں انہوں نے امپائر سے معذرت بھی کی۔پاکستان کی جانب سے محمد عامر نے دو جبکہ محمد عرفان، شعیب ملک، شاہد آفریدی نے ایک ایک وکٹ حاصل کی۔اس سے قبل قومی ٹیم کے کپتان شاہد آفریدی نے ٹاس جیت کر پہلے بیٹنگ کا فیصلہ کیا، خرم منظور اور شرجیل خان نے اننگز کا آغاز کیا، گزشتہ میچوں کی طرح پاکستان کا ٹاپ آرڈر اس بار بھی اسکور کرنے میں ناکام رہا اور 18 رنز پر قومی ٹیم کے 3 کھلاڑی پویلین لوٹ گئے، منظور 7 گیندوں پر ایک، شرجیل خان 10، محمد حفیظ 11 گیندوں پر 2 اور عمراکمل 4 رنز بنا کر آو¿ٹ ہوئے۔ سرفراز احمد اور شعیب ملک نے پانچویں وکٹ کے لیے 70 رنز کی شراکت داری قائم کرکے ٹیم کو مستحکم اسکور فراہم کیا، ملک 41 رنز کی اننگز کھیل کر آو¿ٹ ہوئے جس کے بعد شاہد آفریدی بیٹنگ کے لیے آئے اور اسکور بورڈ کو زحمت دیے بغیر ہی پویلین لوٹ گئے، سرفراز احمد نے شاندار بیٹنگ کا مظاہرہ کرتے ہوئے 58 رنز کی ناقابل شکست اننگز کھیلی۔بنگلہ دیش کی جانب سے عرفات سنی نے 2 ، تسکین احمد، امین حسین اور مشرفی مرتفیٰ نے ایک ایک وکٹ حاصل کی۔