ڈھاکا(نیوز ڈیسک) بھارتی کرکٹ ٹیم کے کپتان مہندرا سنگھ دھونی نے ایشیا ءکپ میں بنائی گئی باﺅلنگ کیلئے سازگار وکٹوں پر تنقید کرتے ہوئے اسے ٹی ٹونٹی کیلئے ناسازگار قرار دیدیا ۔ایشیا ءکپ میں پاکستان کے خلاف میچ میں گھاس سے بھرپور وکٹ پر بھارتی باﺅلرز نے پاکستانی ٹیم کو 83رنز پر ٹھکانے لگا کر اپنی ٹیم کی جیت کی راہ ہموار کی تاہم ایک آسان ہدف کے تعاقب میں بھارتی ٹیم بھی پانچ وکٹیں گنوا بیٹھی۔دھونی نے تنقید کرتے ہوئے کہا کہ کم اسکور کے میچز بھی ایسے نہیں ہونے چاہئیں کہ کوئی ٹیم 80یا 100رنز بنا کر آﺅٹ ہو جائے بلکہ کم از کم 130-140رنز بنائے جا سکیں۔انہوں نے کہا کہ اس سے ورلڈ ٹی ٹونٹی کی تیاری میں مدد نہیں ملے گی، لوگ چوکے چھکے کی وجہ سے ٹی ٹونٹی کرکٹ کو پسند کرتے ہیں اور وہ ٹیموں کو 80یا 100رنز پر آﺅٹ ہوتے دیکھنا نہیں چاہتے۔انہوں نے کہا کہ یہ کہنا مشکل ہو گا کہ یہ پچ ٹی ٹوئنٹی کیلئے اچھی ہے یا نہیں، اس وکٹ پر گیند جتنی زیادہ سوئنگ ہو رہی تھی، اس پر بڑے شاٹس کھیلنا بہت مشکل تھا۔ماضی میں بیٹنگ کیلئے سازگار میرپور کے شیر بنگلہ اسٹیڈیم میں رواں سال فروری کے بعد وکٹ کے رویے میں واضح تبدیلی محسوس کی گئی ہے جہاں خصوصاً پہلے بیٹنگ کرنے والی ٹیم زیادہ رنز بنانے میں ناکام رہی ہے۔اب تک ایشیاءکپ کے کم از کم تین میچ ہری وکٹوں پر کھیلے گئے اور یہی وجہ ہے کہ ان وکٹوں پر رنز ماضی کی نسبت کافی کم اسکور ہوئے اور وکٹ سے فاسٹ بالرز کو مدد ملی۔انڈر 19ورلڈ کپ کا فائنل بھی ایسی ہی وکٹوں پر کھیلا گیا تھا اور سیمی فائنل اور فائنل میں کھلاڑیوں کو ان وکٹوں پر کھیلنے میں کافی دشواری کا سامنا کرنا پڑا تھا۔